Biləsuvarlı pambıqçılar 2024-cü ili yüksək nəticə ilə başa vurublar VİDEO
Biləsuvar, 15 yanvar, İsmayıl Cəfərli, AZƏRTAC
Ötən mövsüm əlverişsiz hava şəraiti səbəbilə Biləsuvarda pambıq yığımı xeyli geciksə də, tarlalardan rayon tarixində ən yüksək məhsuldarlıq əldə edilib. Belə ki, bu günədək tarlalardan 24 min 400 tona yaxın “ağ qızıl” toplanaraq emal müəssisələrə təhvil verilib.
AZƏRTAC xəbər verir ki, 2024-cü ili uğurla başa vuran biləsuvarlı pambıqçılar 7 min hektardan çox sahədə yetişdirilən yüksəkkeyfiyyətli pambıq məhsulunu son qozasınadək toplayaraq emal müəssisələrinə təhvil veriblər.
Ötən illərlə müqayisədə əkin hektarlarında azalma müşahidə olunsa da, müəssisələrin istehsalçılar arasında yaratdığı sağlam rəqabət mühiti yüksək məhsul istehsalına zəmin yaradıb. Toplanan məhsulun orta göstəricisi 34 sentnerdən artıq olmasına baxmayaraq, fərdi təsərrüfatlarda 50, hətta 60 sentner məhsuldarlıq əldə edən fermerlər var. Hər hektardan 50 sentnerdən çox məhsul toplayan fermerlərin sayı ilbəil artmaqdadır. Builki məhsuldarlıq da ürəkaçandır.
“Gübrəsini vermişəm, qulluq etmişəm, 62 sentner məhsul götürmüşəm. Məhsuldarlıq qulluq etməkdən asılıdır. Pambıq sahəsini gəzmək lazımdır. Qurda qarşı dərmanını vaxtı-vaxtında vermək lazımdır. Düşünürəm ki, gələcəkdə su problemi olmasa Biləsuvarda 30-40 hektar sahədə pambıq əkim. İnşallah məhsuldarlıq 60-70 sentneri keçər”, - deyə fermer Ramil Mirzəyev vurğulayıb.
Biləsuvar Dövlət Aqrar İnkişaf Mərkəzindən (DAİM) verilən məlumata görə, 2023-cü il ilə müqayisədə 2024-cü ildə 7 sentner çox olmaqla 24 min 333 ton və yaxud 35,18 sentner pambıq məhsulu toplanılıb. Pambığın hər kiloqramına görə 19 qəpik subsidiya ödənilir. Birinci növ pambığın alıcılığı hər tona görə 800 manat, ikinci növ 780 manat, üçüncü növ 740 manat, dördüncü növ isə 700 manata hesablanır.
“Sevindirici haldır ki, havaların əlverişsiz olmasına baxmayaraq, pambıq yığımı Biləsuvarda uğurla başa çatdırılıb. İkinci sevindirici hal odur ki, yığılan pambığın 92,6 faizi maşınla yığılıb və 1-ci növ kimi qəbul edilib. Bu da keçən illə müqayisədə 4 faiz çoxdur”, - deyə Biləsuvar DAİM-in əməkdaşı Gülağa Qurbanov qeyd edib.
Bölmənin digər xəbərləri
