Parisdə 20 Yanvar şəhidlərinin xatirəsi yad edilib VİDEO
Paris, 21 yanvar, AZƏRTAC
Azərbaycanın Fransadakı səfirliyinin təşkilatçılığı ilə 20 Yanvar faciəsinin 35-ci ildönümü silsilə tədbirlərlə anılıb.
AZƏRTAC xəbər verir ki, Azərbaycanın Fransadakı səfiri Leyla Abdullayeva səfirliyin Mədəniyyət Mərkəzində təşkil edilmiş anım tədbirində Yanvar hadisələrindən danışıb. Azərbaycanın müasir tarixinə qanla yazılmış 20 Yanvarın ölkəmizin azadlıq, müstəqillik mübarizəsinin şərəfli səhifəsi olduğunu qeyd edib.
35 il əvvəl baş vermiş Qanlı Yanvar gecəsində yaşadığı anları bölüşən diplomat bildirib ki, Qanlı Yanvar hadisələri Azərbaycanın istiqlalı yolunda milli məfkurədən güc alan qarşısıalınmaz azadlıq istəyinin başlanğıc mərhələsi oldu. Bu hadisə Azərbaycan xalqının iradəsini qıra bilmədi, milli azadlıq hərəkatının daha da yüksəlməsinə və nəticədə Azərbaycanın yenidən müstəqilliyə nail olmasına gətirib çıxardı.
L. Abdullayeva qeyd edib ki, müasir müstəqil Azərbaycan dövlətinin qurucusu, Ulu Öndər Heydər Əliyevin təşəbbüsü ilə Qanlı Yanvar hadisələrinə ilk siyasi qiymət verən qərar qəbul edilib. Bu təcavüz xalqımızı mənəvi cəhətdən çox sarsıtsa da, onun mənliyini tapdalaya, qürurunu sındıra bilmədi, qəhrəmanlıq salnaməsinə yeni bir səhifə kimi yazıldı.
“Ulu Öndərin siyasi kursunu uğurla davam etdirən Müzəffər Ali Baş Komandan İlham Əliyevin rəhbərliyi altında rəşadətli Ordumuz tariximizin ən möhtəşəm səhifəsini yazdı. Prezident İlham Əliyev Qarabağ Zəfəri ilə Azərbaycan xalqının arzusunu gerçəkləşdirdi. Xalqın həmrəyliyi, ordunun gücü və rəhbərliyin qətiyyəti bu zəfərimizi reallaşdırdı. 20 Yanvar gecəsində tankların altında əzilən, lakin sarsılmayan iradə Qarabağda qələbəyə çevrildi.
Bu gün Azərbaycan regionun lider ölkəsidir. Müstəqil siyasət aparan ölkələrdəndir. Bunun təməlində güclü siyasi iradəmiz və iqtisadi müstəqilliyimiz dayanır. Güclü Azərbaycan özünün müstəqil siyasi, iqtisadi fəaliyyətini regional və beynəlxalq səhnədə uğurla davam etdirir”, - deyə səfir L. Abdullayeva vurğulayıb.
Anım tədbiri 20 Yanvar şəhidlərinin xatirəsinə həsr edilmiş klassik musiqi proqramı ilə davam edib. Konsertdə azərbaycanlı və fransız musiqiçilər - tarzən Sahib Paşazadə, Parisdə yaşayan Azərbaycan əsilli Səidə Zülfüqarova (piano), Omo Bello (soprano) və Qiyom Martinye (violonçel) hər iki ölkənin musiqilərini ifa ediblər. Konsertdə Asəf Zeynallı, Hacı Xanməmmədov, Fikrət Əmirov, Azər Rzayev, Arif Məlikov, Vasif Adıgözəlov, Fərhad Bədəlbəyli ilə yanaşı, İ.Bax, H.Duparc, K.Debüsi, H.Villa-Lobos, L.Bernşteyn, A.Piazzola və Fazil Sayın da əsərləri səsləndirilib.
Tədbir məkanında 20 Yanvar şəhidlərindən bəhs edən kitablar, şəkillər nümayiş olunub.
Qeyd edək ki, yanvarın 20-də Azərbaycanın Fransadakı səfirliyinin və UNESCO yanında Daimi Nümayəndəliyin əməkdaşları Sen-Klu qəbiristanlığında Paris Sülh Konfransının iştirakçısı olmuş Əlimərdan bəy Topçubaşovun və Ceyhun Hacıbəylinin məzarlarını ziyarət ediblər.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
