Çikaqoda Xocalı soyqırımına həsr olunmuş 2-ci Qlobal Dialoq Konfransı keçirilib-YENİLƏNİB VİDEO
Çikaqo, 23 fevral, AZƏRTAC
ABŞ-ın İllinoys ştatında Xocalı soyqırımının ildönümünə həsr olunmuş “Keçmişlə Gələcək Arasında Körpü” (“2nd Global Dialogue Conference: Bridging Past and Future”) adlı 2-ci Beynəlxalq Dialoq Konfransı ABŞ-ın aparıcı ali təhsil ocaqlarından biri olan “Harper College”də keçirilib.
AZƏRTAC xəbər verir ki, konfransda Amerika Azərbaycan Təşkilatları Alyansına daxil olan müxtəlif ştatlardakı üzv təşkilatların rəhbərləri, Azərbaycan icmasının və yerli ictimaiyyətin nümayəndələri, Diasporla İş üzrə Dövlət Komitəsinin, Azərbaycan Respublikasının ABŞ-dakı səfirliyinin, həmçinin Türkiyənin Çikaqodakı baş konsulluğunun rəsmiləri iştirak edirlər. Bundan əlavə, tədbirə ABŞ-ın aparıcı ali təhsil müəssisələrindən professorlar, siyasi analitiklər, jurnalistlər qatılıblar. Konfransın açılışında Amerika və Azərbaycanın Dövlət himnləri səsləndirilib, Xocalı faciəsinin qurbanları bir dəqiqəlik sükutla yad edilib.
Tədbirdə çıxış edən Amerika Orta Qərb Ştatları üzrə Azərbaycan Mərkəzinin rəhbəri Fərid Məmmədov və vitse-prezidenti Mehriban Məmmədova Azərbaycan tarixinin ən dəhşətli səhifələrindən biri olan Xocalı soyqırımı haqqında qonaqlara məlumat veriblər. Bildirilib ki, 1992-ci il fevralın 25-dən 26-na keçən gecə Ermənistan silahlı qüvvələri bütün beynəlxalq hüquq normalarını pozaraq, mühasirədəki Xocalı şəhərinin dinc əhalisini vəhşicəsinə qətlə yetirib.
Konfransda ElTV və “Vətən” Azərbaycan Mədəniyyət və İncəsənət Mərkəzinin “History of Azerbaijan” layihəsi çərçivəsində çəkilmiş Xocalı faciəsindən bəhs edən film nümayiş olunub.
Tədbirdə çıxış edən Azərbaycan Respublikasının Diasporla İş üzrə Dövlət Komitəsinin şöbə müdiri Səlhət Abbasova Xocalı faciəsinin xalqımızın qan yaddaşı olduğunu vurğulayıb. Bildirib ki, torpaqlarımızın azad edilməsi ilə beynəlxalq ədalətin bərpasına xalqımızın gücü ilə nail olunub. Onun sözlərinə görə, Azərbaycan ədalətli yanaşma əsasında davamlı sülh müqaviləsinin imzalanmasının tərəfdarıdır.
Ölkəmizin Vaşinqtondakı səfirliyinin nümayəndəsi Xocalı soyqırımını törədənlərin hüquqi müstəvidə cəzalandırılmasının və bu cinayətə görə beynəlxalq səviyyədə cavab vermələrinin vacibliyini vurğulayıb.
Tədbirdə Azərbaycanın tarixi torpaqlarında aparılan yenidənqurma işləri, eləcə də Prezident İlham Əliyevin Xocalı sakinləri ilə görüşünün əks olunduğu videoçarx nümayiş olunub. Konfrans çərçivəsində təşkil olunan panel ABŞ-da təhsil alan azərbaycanlı tələbə Ağadadaş Balaqadaşovun moderatorluğu ilə baş tutub.
Çində fəaliyyət göstərən geosiyasi analitik Malik Ayub Sumbal Xocalı soyqırımı ilə bağlı tarixi faktları diqqətə çatdırıb, faciənin dəhşətinin xarici mətbuatda işıqlandırılmasından bəhs edib. “Tovuz to Karabakh: A Comprehensive Analysis of War in South-Caucasus” adlı kitabın müəllifi konfrans iştirakçılarına konfliktin tarixinə dair fikirlərini bölüşüb.
Tədbirdə çıxış edən ABŞ-ın Milli Müdafiə Universitetinin(“Nationak Defense University”) dosenti Stefan Bruks Xocalıda Ermənistanın törətdiyi qətliamı müasir dünyanın ən böyük və ağlasığmaz vəhşiliklərdən biri adlandırıb. O qeyd edib ki, etik dəyərlərə və milli kimliyə sahib bir millət heç bir halda belə bir cinayətə təşəbbüs etməz.
Paneldə çıxış edən Azərbaycanın işğaldan azad olunmuş tarixi torpaqlarına səfər etmiş braziliyalı jurnalist Fabiana Mendes Qarabağda gördüklərindən dəhşətə gəldiyini bildirib. Mina partlayışları nəticəsində həlak olan azərbaycanlı jurnalistlər haqqında məlumat verib.
Amerikalı jurnalist, Vaşinqtonda BBC, CNN və “Əl-Cəzirə” kimi kanallarda ABŞ siyasəti və beynəlxalq məsələlərlə bağlı siyasi şərhçi kimi fəaliyyət göstərən Kalvin Dark müzakirələrdə yaxından iştirak edib və Qarabağa səfərindən danışıb.
Konfransda Türkiyənin Çikaqodakı baş konsulu Tahir Bora Atatanır çıxış edərək, Xocalı qurbanlarının xatirəsinin hər bir türkün qəlbində yaşayacağını bildirib. Amerika Azərbaycan Təşkilatları Alyansının üzvlərindən Şimali Korolina Universitetinin professoru Əli Əsgərov Xocalı faciəsi, Ermənistanla Azərbaycan arasındakı konfliktin tarixinə dair maraqlı faktlarla auditoriyanı məlumatlandırıb. Amerika Azərbaycan Təşkilatları Alyansının katibi, Florida ştatında fəaliyyət göstərən Azərbaycan-Amerika Gənclər Təşkilatının sədri Nabat Eminova da çıxışında, Xocalı soyqırımının tanıdılması və ədalətin bərpasına ancaq həmvətənlərimizin birgə səyi ilə nail olmağın mümkünlüyünü qeyd edib. Tədbirdə Xocalı soyqırımı şahidlərinin ağır xatirələrini əks etdirən videolar iştirakçıların diqqətinə çatdırılıb.
Konfransın bədii hissəsində Aqil Hüseynovun tarda ifasında “Bayatı-Şiraz”, İllinoys ştatında yaşayan pianoçu Günay Ələskorovanın ifasında öz bəstəsi olan “Xatirələr” musiqisi səsləndirilib.
Məlahət Nəcəfova
AZƏRTAC-ın xüsusi müxbiri
Çikaqo
Bölmənin digər xəbərləri
