Belarus nümayəndəsi: Müəssisələrimiz Bakıdakı sərgidə sərfəli kontraktlar imzalayır VİDEO
Bakı, 14 may, AZƏRTAC
Azərbaycanla münasibətlərimiz çox mehriban və yüksək səviyyədədir. Biz hər il Azərbaycanda keçirilən sərgidə iştirak edirik. Belarusun ət-süd sənayesi, qənnadı məmulatları, spirtli içkilər istehsalı müəssisələrini gətiririk. Şirkətlərimiz isə sərfəli müqavilələr bağlayır. Hər il Belarus ekspozisiyası 100 kvadratmetrdən çox ərazini əhatə edir.
Bu barədə AZƏRTAC-a müsahibəsində “Belinterexpo” sərgi şirkətinin mütəxəssisi Natalya Romançuk XXX Yubiley Azərbaycan Beynəlxalq Qida Sənayesi - “InterFood Azerbaijan” və XVIII Azərbaycan Beynəlxalq Kənd Təsərrüfatı - “Caspian Agro” sərgiləri çərçivəsində məlumat verib.
Belarus pavilyonunun nümayəndəsi qeyd edib: “Xatırladığımız qədər, keçən il sərgiyə prezidentlər İlham Əliyev və Aleksandr Lukaşenko gəlmişdi. Sərgi genişmiqyaslı idi. Əminəm ki, prezidentlərimiz bu sərgini bəyəndilər. Bizim dostluq münasibətlərimiz, əlbəttə ki, müəssisə rəhbərlərinin qarşılıqlı səfərlər həyata keçirmək, əməkdaşlıq etmək, qarşılıqlı əlaqələri inkişaf etdirmək, mal və məhsulların təchizatını artırmaq istəyində öz əksini tapır”.
Pavilyonda 24 müəssisənin təmsil olunduğunu qeyd edən Natalya Romançuk deyib: “Bunlar ət, süd, qənnadı və spirtli içkilər sənayesini təmsil edir. Hər il sərgidə Belarusun kənd təsərrüfatı texnikası istehsal edən "Qomselmaş" Açıq Səhmdar Cəmiyyəti də iştirak edir. Ümid edirik ki, biz səmərəli əməkdaşlıq edəcəyik, hər il bu sərgiyə qatılacaq və Azərbaycan müəssisələrini öz pavilyonumuzda qarşılayacağıq”.
O, daha sonra bildirib: “Keçən il iki yüz kvadratmetrdən çox sahəni əhatə edən geniş ekspozisiyamız və təntənəli şəraitdə müqavilələr, sazişlərin imzalandığı bir səhnəmiz vardı. Bağlanan kontraktların miqdarı olduqca təsiredici idi. Bu isə ümidvericidir, çünki şirkət təkcə tanış olmaq, məhsulunu, onun dadını göstərmək üçün deyil, həm də sərfəli müqavilələr bağlamaq üçün gəlir. Bu il pavilyonda müqavilələrin imzalanması gözlənilmir, lakin bizim müəssisələrimiz əvvəlcədən lazımi məsələlər üzərində işləyir, tərəfdaşları ilə görüşür və artıq pərdə arxasında sənədlər imzalanır”.
Bölmənin digər xəbərləri
