Meşədə azmamaq üçün diqqət edilməli məqamlar - ARAŞDIRMA VİDEO
Lənkəran, 26 may, İlkin Adıyev, AZƏRTAC
Yay mövsümü başlayar-başlamaz, insanlar təbiətin qoynunda istirahət etmək üçün meşəlik ərazilərə üz tuturlar. Kimisi bu yerlərdə dincəlmək, kimisi isə macəra axtarışına çıxmaq istəyir. Lakin meşəlik ərazilərdə ehtiyatsız davranışlar bəzən xoşagəlməz nəticələrə – məsələn, azmağa və ya itməyə səbəb ola bilir. Bəs, belə hallarla qarşılaşmamaq və təhlükəsiz istirahət etmək üçün hansı vacib məqamlara diqqət yetirmək lazımdır?
AZƏRTAC-ın bölgə müxbirinin mövzu ilə bağlı hazırladığı reportajı təqdim edirik.
Sıx meşəlik ərazilərə səfər edib təbiətin möhtəşəm gözəlliklərindən zövq almaq hər bir turistin arzusudur. Ölkəmizdəki bir çox meşə massivləri və Milli Parklarda isə bu arzunun həyata keçməsi üçün xüsusi hərəkət marşrutları hazırlanıb. Məsələn, Hirkan Milli Parkında 10 müxtəlif marşrut mövcuddur. Buraya gələn ziyarətçilər təcrübəli bələdçilərin müşayiəti ilə meşənin dərinliklərinə doğru səyahət edərək, təbiətin nadir gözəlliklərini görə bilirlər. Lakin qaydalara əməl etməyənlər üçün sıx meşə zolaqlarında azmaq riski daim mövcuddur.
Hirkan Milli Parkının baş elmi işçisi Həbib Rəhimov qeyd edir ki, meşədə azmamaq üçün bələdçi ilə hərəkət etmək, istiqamətverici nişanlara diqqət yetirmək əsas şərtlərdəndir. Lakin bunlardan əlavə, diqqət edilməli başqa vacib məqamlar da var: “Meşəyə daxil olan hər bir şəxs əvvəlcədən hazırlıqlı olmalıdır. Səfər zamanı yüngül, lakin hava şəraitinə uyğun geyim seçilməli, rahat ayaqqabı geyilməlidir. Əgər marşrut uzunmüddətlidirsə, mütləq su və yüngül qida ehtiyatı götürülməlidir. Kompas və ya GPS cihazı da olduqca vacib vasitələrdəndir. İnsanlar bəzən texnologiyaya həddən artıq güvənir və bu, onların diqqətsiz davranmasına səbəb olur. Telefonlar sönə bilər, siqnal zəifləyə bilər. Ona görə də klassik üsullar – məsələn, kompas, kağız xəritə və istiqamət nişanları hələ də öz aktuallığını qoruyur. Bu vasitələrin istifadə qaydalarını bilmək meşədə təhlükəsiz hərəkət etmək üçün çox önəmlidir. Əgər hər hansı bir səbəbdən istiqamətinizi itirmisinizsə, hərəkət etmədən bir yerdə qalmaq və səsli siqnallar vermək axtarış qruplarının sizi tez tapmasına kömək edə bilər. Unutmayın ki, hərəkətdə olan insanı tapmaq daha çətindir”, - deyə Həbib Rəhimov əlavə edir.
Milli parkı ziyarət edən hər bir turistin yolunu asanlıqla tapması üçün ağaclara xüsusi nişanlar vurulub. Bu nişanlara marşrut boyunca hər 50 metrdən bir rast gəlmək mümkündür. Hər hansı şəxs təkbaşına və köməksiz vəziyyətdə olarsa, bu nişanlardan düzgün istifadə edərək, meşədə azmaqdan asanlıqla xilas ola bilər.
Hirkan Milli Parkının müfəttişi Sahil Mikayılovun sözlərinə görə, meşədə azmamaq üçün hər bir turist səfərdən öncə ciddi hazırlıq görməlidir. O bildirir ki, ilk növbədə, insanlar marşrut xəritəsi ilə tanış olmalı, bələdçi ilə hərəkət etməli və mobil telefonlarının tam dolu olduğundan əmin olmalıdırlar: “Sıx meşəlik ərazilərdə istiqamət tapmaq bəzən peşəkar insanlar üçün də çətin ola bilir. Bu səbəbdən biz meşə marşrutları boyunca ağacların üzərinə Çexiya təcrübəsinə əsaslanan xüsusi istiqamətverici nişanlar yerləşdirmişik. Bu nişanlar hər 50 metrdən bir təkrarlanır və onları izləyən şəxs rahatlıqla marşrut üzrə hərəkət edə bilir. Ziyarətçilərin əksəriyyəti meşədə bələdçilərlə birlikdə gəzir, lakin bəzi hallarda macəra həvəsi ilə təkbaşına dərinliyə gedən turistlər də olur. Ötən mövsüm bir turist marşrutu tərk edərək sıx meşə zolağına daxil olub azmışdı. Xoşbəxtlikdən, vaxtında xəbər tutduq və nəzarətçilər tərəfindən təhlükəsiz şəkildə tapıldı. Amma hər zaman belə şans olmur. Tək halda dərinliyə getmək risklidir və bəzən bu risk həyat bahasına başa gələ bilər”.
Statistikaya əsasən, hər il meşəlik ərazilərdə turistlərin azma halları nadir olsa da, baş verir. Onun üçün də təkbaşına meşənin dərinliklərində macəra axtarışı bəzən sizin həyatınıza ciddi təhlükə yarada bilər.
Bölmənin digər xəbərləri
