Ağdamda "Yüksəksəviyyəli perspektivlər: Regional inkişafda gənclərin rolu" mövzusunda plenar panel keçirilib VİDEO
Ağdam, 1 iyul, AZƏRTAC
Ağdamda İqtisadi Əməkdaşlıq Təşkilatının (ECO) Gənclər Forumu çərçivəsində iyulun 1-də "Yüksəksəviyyəli perspektivlər: Regional inkişafda gənclərin rolu" mövzusunda plenar panel keçirilib.
AZƏRTAC-ın Ağdama ezam olunmuş müxbiri xəbər verir ki, Gənclər və İdman Nazirliyinin beynəlxalq əlaqələr şöbəsinin müdiri Zərifə Zülfüqarovanın moderatorluğu ilə keçən plenar paneldə çıxış edən Qırğızıstanın mədəniyyət, informasiya və gənclər siyasəti nazirinin birinci müavini Soiuzbek Nadyrbekov təmsil etdiyi ölkənin gənclər siyasətindən bəhs edib. O, hər il ölkəsində keçirilən gənclər forumunun 2 minə yaxın gənci bir araya gətirdiyini diqqətə çatdırıb.
"Gəlin elə edək ki, Ağdamda keçirilən Gənclər Forumu ideyanın başlanğıcına çevrilsin, aradakı həmrəyliyi gücləndirsin", - deyə S.Nadyrbekov forum iştirakçılarına səslənib.
Forumda İqtisadi Əməkdaşlıq Təşkilatının regionunun gələcəyini təmin edən şəxslərin bir araya gəldiyini deyən ECO Təhsil İnstitutunun rəhbəri Mehmet Akif Kireççi həyatımızın hər bir aspektini əhatə edən təhsilin önəmindən bəhs edib: "İnkişaf mexanizmlərində təhsil bir model kimi göstərilir. Gənclərin nəinki nəzəri, həmçinin əməli bacarıqlarını müasir zəmanənin tələblərinə uyğunlaşdırması üçün lazımi təhsil imkanları olmalıdır. Ən bacarıqlı gəncləri irəli doğru çəkməliyik. Gənclərin təhsil alması dünyada baş verən proseslərlə bağlı məlumatlı olması baxımından önəmlidir".
ECO-nun Özbəkistandan olan gənclər nümayəndəsi Şahnozaxon Raxmanova gənclərin burada siyasəti formalaşdıran şəxslərlə, elmi dairələrlə bir araya gəlməsinin xüsusi əhəmiyyətə malik olduğunu deyib. ECO regionunda 500 milyondan çox insanın yaşadığını və onların əksər hissəsinin gənclər olduğunu qeyd edən Özbəkistan nümayəndəsi forumun gənclərə öz fikirlərini ifadə etməyə şərait yaradan mühüm platforma olduğunu deyib.
ECO Elm Fondunun prezidenti Sayed Komail Tayabi iqtisadi inkişaf üçün elmin vacibliyindən bəhs edib: "Elm olan cəmiyyətdə inkişaf da var. Bu da inklüziv iqtisadi artım deməkdir. Digər yandan insan kapitalını formalaşdırır. İqtisadi, dayanıqlı inkişafın əsasında insan kapitalı dayanır. Təşkilat olaraq təhsil sahəsinə sərmayə yatırırıq. Bu da yekun nəticədə bizi dayanıqlı inkişafa gətirir. ECO regionu, o cümlədən Azərbaycan böyük potensiala malikdir. Çünki əhalinin əksər hissəni gənclər təşkil edir. Gənclər arasında təhsilin inkişafına xüsusi diqqət yetirilməsinə dair digər qabaqcıl ölkələrin təcrübəsi region üçün modeldir və gələcəyimizin təmini baxımından bir yoldur. Region ölkələrinə səslənərək demək istəyirəm ki, elm, təhsil, innovasiyaya əsaslanan siyasətə daha çox sərmayə yatırsınlar. Elm, texnologiya və innovasiya sahəsində gənclər daha çox təmsil olunsun".
Xarici İşlər Nazirliyinin İqtisadi əməkdaşlıq idarəsinin rəisi Elmar Məmmədov Azərbaycanın COP29 çərçivəsində Qlobal Bakı Təşəbbüsü ilə çıxış etdiyini və onun iqlim müqaviməti baxımından insan kapitalının formalaşdırılmasını hədəflədiyini vurğulayıb: "Həmçinin Bakı Bələdçi Prinsiplərini tərtib etdik. Bu zaman 12 prinsip hazırlandı və 14 beynəlxalq təşkilatı ilə birgə bəyanat qəbul etdik. Hazırda görürük ki, Bakıda qəbul olunmuş bələdçi prinsiplər ölkələr tərəfindən təsdiqlənir. Digər təşəbbüsümüz iqlim maliyyəsi və ticarət üzrə investisiyadır. Keçid dövrü yaşayan ölkələrə yardım məqsədilə ticarət investisiyası və iqlim maliyyəsini - ilk dəfə olaraq iki sahəni bir araya gətirdik. İrəli sürülən təşəbbüslər üçün Asiya İnkişaf Bankından dəstək alırıq. Hesab edirəm ki, ECO-da da bunu həyata keçirə bilərik".
Plenar panel fikir mübadiləsi ilə davam edib.
Bölmənin digər xəbərləri
