Cənub bölgəsində həndbola maraq artır: Yeni komandalar, böyük hədəflər FOTO VİDEO
Lənkəran, 15 dekabr, İlkin Adıyev, AZƏRTAC
AZƏRTAC-ın "Bölgələrdə idman" layihəsi çərçivəsində növbəti reportaj Lənkərandandır. Reportajı oxucularımıza təqdim edirik.
Cənub bölgəsində idmanın müxtəlif növlərinə, o cümlədən həndbola xüsusi maraq var. Son illərdə regionda idmanın inkişafı istiqamətində atılan addımlar nəticəsində uşaqlar və yeniyetmələr arasında həndbola maraq artıb.
AZƏRTAC-ın bölgə müxbiri xəbər verir ki, bölgədə həndbol idman növünün tədrisi və məşqlərin təşkili artıq daha peşəkar, planlı və sistemli formada aparılır. Uşaqlar məşqlər zamanı həndbolun əsas texniki və taktiki elementləri ilə yaxından tanış olur, oyunun quruluşu, müdafiə və hücum prinsipləri, top idarəetməsi kimi bacarıqları mərhələli şəkildə mənimsəyirlər.
Artıq bir neçə aydır ki, regionda bu idman növünün tədrisinə xüsusi diqqət yetirilir. Məhz bu məqsədlə həndbol üzrə yığmanın sabiq baş məşqçisi, “Əməkdar bədən tərbiyəsi və idman xadimi” Vidadi Əliyev Azərbaycan Həndbol Federasiyasının cənub bölgəsi üzrə koordinatoru təyin edilib.
Onun rəhbərliyi ilə Lənkəran, Astara, Cəlilabad, Lerik, Masallı və Yardımlı rayonlarında 2012–2013-cü il təvəllüdlü oğlanlardan ibarət yeni komandaların formalaşdırılması istiqamətində işlər aparılır.
Vidadi müəllim bildirir ki, Cənub bölgəsində həndbolun inkişaf etdirilməsi gələcəkdə peşəkar komandaların formalaşmasına zəmin yaradacaq. Uşaqlara həm yarışlara hazırlaşmaq, həm də sağlam həyat tərzini öyrətmək üçün xüsusi proqramlar hazırlanıb. Məşqlər təkcə texniki bacarıqların artırılmasına yox, həm də uşaqların fiziki inkişafının və koordinasiyasının gücləndirilməsinə yönəlib: “Artıq iki aydan çoxdur ki, Cənub zonasındayam və burada həndbolun inkişafı istiqamətində ardıcıl işlər aparırıq. Hazırda Lənkəran Olimpiya İdman Kompleksində məşqlərə start vermişik və proses dinamik şəkildə davam edir. Lənkəranla yanaşı, Astara, Cəlilabad, Masallı, Lerik və Yardımlı rayonlarında da həndbol üzrə təlim-məşq qrupları yaradılıb. Hər rayonda uşaqlar bu idman növünə böyük maraq göstərir və biz onlarla gündəlik olaraq həm texniki, həm taktiki hazırlıq üzərində çalışırıq. Məqsədimiz cənub bölgəsində həndbolu kütləviləşdirmək və bu regiondan peşəkar komanda və idmançıların yetişməsinə şərait yaratmaqdır. Biz məşqlərdə uşaqların fiziki bacarıqlarından əlavə, onların psixoloji dözümlülüyünü də inkişaf etdirməyə çalışırıq. Həndbol gənclərə yalnız sürət və çeviklik qazandırmır, eyni zamanda, qərar vermə bacarığını, məsuliyyət hissini və streslə mübarizə qabiliyyətini də formalaşdırır. Hədəfimiz təkcə şəhər səviyyəsində deyil, region və ölkə miqyasında həndbolun inkişafına töhfə verməkdir. Cənubda gələcəkdə ölkə çempionatlarında çıxış edəcək komandaların yetişəcəyinə inanıram. Biz, həmçinin valideynlərin bu idman növünə marağını artırmaq üçün seminarlar və açıq məşqlər təşkil edirik. Gələcəkdə həndbol infrastrukturunu genişləndirmək – zalların təchizatını yaxşılaşdırmaq və peşəkar məşqçi heyəti və ən əsası da həndbol idman növü üzrə akademiya yaratmaq da planlarımız arasındadır. İstəyirik ki, həndbol həm əyləncə, həm də ciddi idman kimi formalaşsın”.
Digər məşqçi Fəzail Əbilov isə bildirir ki, həndbol həm maraqlı, həm də əyləncəli idman növüdür. O, uşaqlara yalnız sürət, çeviklik və dözümlülük qazandırmır, eyni zamanda, liderlik və məsuliyyət bacarıqlarını da inkişaf etdirir: “Bizim əsas məqsədimiz cənub bölgəsində həndbolu inkişaf etdirməkdir və bu bölgənin yığma komandasını yaratmaqdır. Bölgədə idmanın şaxələndirilməsi, gənclərin fiziki sağlamlığının artırılması və peşəkar idmançıların yetişdirilməsi baxımından mühüm əhəmiyyət kəsb edir. Gələcəkdə şəhər komandalarının ölkə səviyyəli turnirlərdə iştirak etməsi, həmçinin Lənkəranın idman həyatında xüsusi yer tutması üçün var gücümüzlə çalışırıq” , - deyə məşqçi vurğulayır.
Komandanın kapitanı Davud Əsədli isə təəssüratlarını belə ifadə edir: “Əvvəllər Lənkəranda həndbol idman növünün olduğunu bilmirdim. Bir gün məktəbimizə gəlib bu idmanla bağlı məlumat verdilər və o andan etibarən marağım yarandı. Həvəslə məşqlərə qoşuldum və qısa zamanda hiss etdim ki, həndbol mənim üçün həm sevimli məşğuliyyət, həm də inkişaf imkanıdır. Bizim komandanın hər bir üzvü həndbolu çox sevir. Mən həqiqətən də bu idman növünə böyük maraq göstərirəm. Hər məşq mənim üçün həm əyləncə, həm də öyrənmək imkanıdır. Biz bir-birimizi dəstəkləyirik, komanda ruhumuz yüksəkdir və hər gün daha da inkişaf edirik”.
Beləliklə, müşahidələrimiz də göstərir ki, gənclərin idmana böyük marağı var. Cənub bölgəsi kimi digər regionlarda da idmanın müxtəlif növlərinə maraq getdikcə artır və bu sahədə sistemli inkişaf müşahidə olunur. Ölkənin hər yerində, o cümlədən Lənkəran, Astara, Cəlilabad və digər rayonlarda təlim-məşq qrupları yaradılır və məşqlər daha peşəkar və planlı şəkildə təşkil edilir. Bu təşəbbüslər gənclərin fiziki sağlamlığını gücləndirməklə yanaşı, onlara məsuliyyət, komanda ruhu və qərarvermə kimi bacarıqları aşılamağa hədəflənib. Lənkəranda həndbol komandasının yaradılması və idman infrastrukturunun genişləndirilməsi kimi gələcək planlar bölgələrdən peşəkar idmançıların yetişməsinə və ölkə çempionatlarında iştirak edəcək komandaların formalaşmasına zəmin yaradır. Nəticədə, bu cür ardıcıl addımlar sayəsində bölgələrdə idman kütləviləşir və gələcəkdə ölkə, hətta dünya səviyyəli yarışlarda iştirak edəcək idmançılar yetişdirmək perspektivi yaranır. Ümid edirik ki, gələcəkdə Lənkərandan, o cümlədən cənub bölgəsindən çıxan komandalar ölkə və dünya səviyyəli yarışlarda iştirak edərək, böyük uğurlara imza atacaqlar.
Bölmənin digər xəbərləri
