Cəbrayıl və Zəngilan rayonlarında ilk dəfə Yeni il Qış yarmarkası keçirilib FOTO VİDEO
Zəngilan, 30 dekabr, AZƏRTAC
31 Dekabr - Dünya Azərbaycanlılarının Həmrəyliyi Günü və Yeni il münasibətilə Cəbrayıl şəhərində və Zəngilan rayonunun Ağalı kəndində sərgi-satış yarmarkası keçirilib. Yarmarka Cəbrayıl, Qubadlı və Zəngilan rayonlarında Prezidentin xüsusi nümayəndəliyinin dəstəyi, Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidmətinin təşkilatçılığı ilə ərsəyə gəlib.
AZƏRTAC-ın bölgə müxbiri xəbər verir ki, Cəbrayıl şəhər meydanında və Zəngilanın Ağalı kənd parkında keçirilən yarmarkalarda Cəbrayıl və Zəngilan sakinləri iştirak ediblər. Burada yerli sakinlər tərəfindən hazırlanmış orqanik qidalar, kənd təsərrüfatı məhsulları, əl işləri təqdim olunub.
Yeni il musiqilərinin fonunda əylənən ziyarətçilər üçün soyuq qış havasında isti içkilər və qidalardan dadmaq imkanı yaradılıb. Sakinlər yarmarkanın müxtəlif hissələrində qurulmuş köşklərdə özlərinin hazırladıqları məhsulları satmaq imkanı da əldə ediblər. Ləziz təamların satışı ilə yanaşı, əl işləri və suvenirlərə də böyük maraq olub.
Yüksək əhvali-ruhiyyə ilə keçən yarmarkalar uşaqların sevdikləri rəngarəng nağıl personajları, canlı şoular və musiqili proqramlarla tamamlanıb.
Bölmənin digər xəbərləri
