Daşkəsəndə güləşə maraq artır - Gənc pəhləvanlar böyük hədəflərə doğru REPORTAJ FOTO VİDEO
Daşkəsən, 15 yanvar, Vüsalə Cənnətova, AZƏRTAC
AZƏRTAC-ın "Bölgələrdə idman" layihəsi çərçivəsində növbəti reportajımız Kiçik Qafqazın şimal-şərqində, dəniz səviyyəsindən 1600–1800 metr yüksəklikdə yerləşən Daşkəsəndəndir. Reportajı oxucularımıza təqdim edirik.
Güləş dünyada və ölkəmizdə hər zaman insanların maraq göstərdiyi idman növüdür. Azərbaycanın ev sahibliyi etdiyi mötəbər yarışlarda, həmçinin beynəlxalq arenalarda güləşçilərimizin qazandıqları nailiyyətlər yetərincədir. Bu məqam və son illərdə regionlarda bu idman növünün daha da inkişaf etdirilməsi istiqamətində atılan addımlar nəticəsində daşkəsənli uşaq, yeniyetmə və gənclərin də güləşə marağı böyükdür. 1963-cü ildən fəaliyyət göstərən Daşkəsən Rayon Uşaq-Gənclər İdman-Şahmat Məktəbində 24 məşqçi-müəllim tərəfindən 35 qrupda 378 şagirdə voleybol, stolüstü tennis, şahmat idman növləri ilə yanaşı, yunan-Roma güləşinin də sirləri öyrədilir. İstedadların kütləvi şəkildə yetişdirilməsi üçün yunan-Roma güləşi üzrə məktəbə qəbul 7 yaşdan başlayır.
Təcrübəli məşqçi-müəllimlər şagirdlərin seçdikləri idman növünün incəliklərini dərindən mənimsəmələri üçün bütün səy və bacarıqlarını sərf edirlər. Daşkəsən Rayon Uşaq-Gənclər İdman-Şahmat Məktəbinin direktoru Mübariz Mürsəlovun sözlərinə görə, hazırlıq prosesi yalnız fiziki məşqlərlə məhdudlaşmır, həm də psixoloji və intellektual inkişaf, sağlam həyat tərzi prinsiplərinə əsaslanır. Nəticədə məktəbin yetirmələri respublikada keçirilən bir çox yarış və turnirdə uğurlu nəticələr əldə ediblər. Ən istedadlı güləşçilər isə yığmaya cəlb olunurlar.
“Yunan-Roma güləşinin rayonumuzda inkişafı üçün çalışırıq. Hazırda bu bölmədə 6 məşqçi-müəllim 6 qrupda 78 nəfərə yunan-Roma güləşini öyrədir. Ötən il idmançılarımız “Təhsil” Respublika İdman Mərkəzinin və Azərbaycan Güləş Federasiyasının keçirdikləri yarışlarda iştirak ediblər. Fəxrlə qeyd etmək istərdim ki, iki yetirməmiz həmin yarışlarda mükafata layiq yerlər tutub. Gələcəkdə regionda keçirilən və “Təhsil” Respublika İdman Mərkəzinin təşkilatçılığı ilə reallaşacaq yarışlara qatılıb, nailiyyətlər əldə etməyi planlaşdırırıq”, - deyə o vurğulayır.
Daşkəsən Rayon Uşaq-Gənclər İdman-Şahmat Məktəbi uyğunlaşdırılmış binada fəaliyyət göstərir. Ötən il Elm və Təhsil Nazirliyinin dəstəyi ilə məktəbdəki mövcud zalların maddi-texniki bazası gücləndirilib, təlim avadanlıqları yenilənərək müasir standartlara uyğunlaşdırılıb. Bundan başqa, binanın istilik sistemi yenilənib və idmançıların rahat məşq keçməsi üçün daha münbit şərait yaradılıb. Bu amillər və təcrübəli idmançılarımızın əldə etdikləri böyük uğurlar rayonda uşaq, yeniyetmə və gənclərin güləşə marağının artması ilə nəticələnir. Mübariz Mürsəlov da bunu təsdiqləyir: “Yığma komandalarımızın sərbəst və yunan-Roma güləşi üzrə beynəlxalq yarışlarda qazandıqları yüksək nailiyyətlər, müxtəlif əyarlı medalların ölkəmizə gətirilməsi həm də yeniyetmə və gənclər, eləcə də valideynlər arasında xüsusi təbliğat formasıdır. Şagirdlər çalışırlar ki, idmanla mütəmadi məşğul olsunlar, tanınmış idmançılara bənzəsinlər”.
Məşqçi-müəllim Zaur Həsənovla da söhbət edirik. Bildirir ki, Daşkəsən rayonunda güləş idman növünün populyarlaşması, istedadlı idmançıların üzə çıxarılması, onların peşəkar səviyyədə hazırlaması əsas hədəflərdəndir. Hər il ölkə üzrə müxtəlif yaş qrupları arasında çempionatların, yarışların təşkil edilməsi və daşkəsənli idmançıların bu yarışlarda iştirakı, eləcə də nailiyyətlər əldə etməsi olduqca sevindiricidir. “Hazırda iki yetirməmiz – Verdiyev Ömər Rasim oğlu və Məmiyev Səfər Şakir oğlu yığma komandanın üzvüdür. U-15 və U-17 yığmalarında güləş üzrə ölkə birinciliklərində ikinci və üçüncü yerləri qazanıblar. Gələcəkdə şagirdlərimizdən bundan da böyük nailiyyətlər gözləyirik. Çalışırıq yarışlardan qalmayaq. Gəncə, Mingəçevir, Yevlax, Balakən, Göygöl, Goranboy, Şəmkir, Qazax, Ağstafada keçirilən yarışlarda nəticələr əldə etmişik. İddialı uşaqlarımız var. Şagirdlərimizdən Murad Nəcəfov və Yusif Əliyevə Bakıdakı komandaların birindən təklif də gəlib”, - deyə məşqçi-müəllim söyləyir.
Cəmi 8 yaşı olmasına baxmayaraq, Murad Nəcəfov yunan-Roma güləşinə böyük maraq göstərir. Müəlliminin tapşırıqlarını məsuliyyətlə yerinə yetirən balaca pəhləvanın hədəfləri olduqca böyükdür. Murad gələcəkdə peşəkar idmançı kimi beynəlxalq arenalarda ölkəmizin bayrağını dalğalandırmağı arzulayır. “Müəllimin öyrətdiyi fəndləri yadımda saxlamalıyam. Onları yarışlarda tətbiq etməliyəm. Məşqi çox sevirəm, bizim üçün önəmlidir. Güləş sağlamlıqdır. Mən ölkəmizdəki yarışlarda birinci, ikinci, üçüncü yerləri tutmuşam. Amma bu, mənim üçün azdır, Avropa, dünya çempionu olmaq istəyirəm”.
Muradın həmyaşıdı Mustafa Vahabzadə də onun qədər iddialıdır. “Mən üzərimdə işləmişəm. Yarışlarda qızıl, gümüş, bürünc medal qazanmışam. Mən Respublika, Olimpiya çempionu olacağam”, - deyə balaca idmançı arzularını, gələcək hədəflərini dilə gətirir.
Məktəbin digər şagirdləri də Murad və Mustafa kimi yüksək əzm və motivasiya nümayiş etdirirlər. Onları məşqlərdə ruhlandıran əsas məqam isə ustadlarının yolunu davam etdirib, Azərbaycanın idman şərəfini dünyada uca tutmaq arzusudur. İnanırıq ki, daşkəsənli güləşçilərin bu niyyətləri çin olacaq, onların qələbə sədaları ən uca kürsülərdən gələcək. Şübhəsiz ki, bu uğurların ən böyük qalibi yenə də Azərbaycan idmanı olacaq.
Bölmənin digər xəbərləri
