8 yaşlı Sabir Beynəlxalq Olimpiadanın finalında iştirak etmək istəyir FOTO VİDEO
Qobustan, 11 dekabr, Rəşad Türkoğlu, AZƏRTAC
Qobustanın ucqar Sündü kəndində yaşayan 8 yaşlı Sabir Ağaverdiyev təhsildə qazandığı nailiyyətlərlə həm oxuduğu məktəbin, həm də rayonun fəxrinə çevrilib. Şikar Şikarov adına Sündü kənd tam orta məktəbin 3-cü sinif şagirdi olan Sabir bilik yarışlarında, sınaq imtahanlarında və müxtəlif intellektual müsabiqələrdə dəfələrlə birincilik qazanaraq diqqət mərkəzinə düşüb.
AZƏRTAC-ın bölgə müxbiri Sündü kəndinə gedərək Sabir Ağaverdiyevin oxuduğu məktəbə baş çəkib, onun ailəsinə qonaq olub.
Sabirin uğurları əvvəlcə rayon və respublika səviyyəli olimpiadalarda özünü göstərib. Müəllimlərinin sözlərinə görə, o, dərslərə məsuliyyətlə yanaşır, riyaziyyat və ədəbiyyatı xüsusi maraqla öyrənir, yeni bilikləri əzbərləmək əvəzinə, dərk etməyə çalışır.
Beynəlxalq “Brainiacs” Riyaziyyat Olimpiadasında iştirak etmək üçün Bakıda keçirilən seçim turuna müstəqil şəkildə qatılan Sabir gümüş, Beynəlxalq Fermat (FMO) Riyaziyyat Olimpiadasında isə qızıl medal qazanıb. Qızıl medal ona yanvar ayında Vyetnamda, gümüş medal isə mart ayında Malayziyada keçiriləcək beynəlxalq olimpiadada iştirak hüququ verib.
Balaca Sabir uğurlarından danışarkən deyir: “Təcrübəsiz olduğum üçün ilk vaxtlar bir qədər az bal yığsam da, ruhdan düşmədim. Sonuncu olimpiadada 100 baldan 88 bal yığdım və bunların hamısı mənim müəllimlərimin, valideynlərimin, xüsusilə Aysel bibimin sayəsində oldu”.
Bu uğur Sabirin əzminin, kitablarla keçirdiyi saatların nəticəsi idi. Bəlkə də dəstək olmasaydı, bu uğurlara imza ata bilməzdi. Müəllimlərinin, valideynlərinin, bibisinin verdiyi güvən Sabir üçün ən böyük motivasiyadır.
Məktəbin direktoru Cahid Nəzərov Sabirin məktəb üçün nümunəvi şagird olduğunu, bilik və bacarıqları, dərin hafizəsi, intellekt və istedadı ilə həmyaşıdlarından fərqləndiyini bildirir: “Məktəbimiz ucqar dağ kəndində yerləşsə də, dövlət tərəfindən bizim üçün müasir və geniş imkanlara malik bina tikilib. Şagird sayımız çoxdur və onların arasında Sabir kimi qeyri-adi istedadların yetişməsi bizi daha da qürurlandırır. Onun olimpiadalarda qazandığı nəticələr yalnız məktəbin deyil, bütün rayonun uğurudur”.
Sabirin atası Cabir Ağaverdiyev oğlunun istedadının hələ 3 yaşında üzə çıxdığını söyləyir: “O, həmyaşıdları kimi oyuncaqlara deyil, kitablara maraq göstərib. İlk sözlərini deməyə başladığı vaxtdan artıq hərflərlə, şəkillərlə tanış olub”. Atası deyir ki, Sabir iki yaşından Azərbaycan dilində səlis oxumağı və yazmağı bacarıb. Riyazi hesablamaları tez qavraması, suallar verməyi sevməsi, hətta “Quran” ayələrini əzbər bilməsi ailədəki hər kəsi heyrətləndirib. Bundan başqa, bayraqları tanımağı hobbi deyil, sanki yaddaş məşqi kimi onun gündəlik fəaliyyətinə çevrilib.
“Bir yaşı olanda gördük ki, heç bir oyuncaqla oynamır. Ziyalı ailəsi olduğumuzdan evdə daim kitab və qələm olub. Sabir də həmişə kitab-dəftərlə oynayırdı. Onun marağını görüb, istedadının qarşısını almaq yox, dəstəkləmək qərarına gəldik”, - deyə C.Ağaverdiyev əlavə edir.
Sabir indiyədək dörd dəfə beynəlxalq müsabiqədə finala çıxmasına baxmayaraq, ailəsi xaricə getməkdə çətinlik çəkib. Çünki bu səfərlərin bütün xərcini ailə qarşılamalı idi – həm bilet, həm qalmağa yer, həm də azyaşlı olduğuna görə müşayiətçi xərcləri. Elə axırıncı olimpiadanın finalına da gedə bilməyəcəkləri üçün təəssüflənir.
Cabir Ağaverdiyev deyir: “Artıq beşinci dəfədir ki, finala çıxırıq, amma xaricdə olduğuna görə gedə bilmirik. Tokio, Sinqapur, başqa şəhərlər… Hamısında final var idi, amma imkanımız çatmadığına görə gedə bilmədik. Mənim məqsədim şikayətlənmək deyil, sadəcə vəziyyəti izah etməkdir. Arzum odur ki, belə uşaqların yolu açıq olsun. Oğlumun ölkəmizi beynəlxalq olimpiadaların final mərhələlərində təmsil etməsini istərdim”.
Sabirin otağı diplomlar, rəflərə düzülmüş medallar, kitablar və intellektual oyunlara aid vəsaitlərlə doludur. Otaq balaca olsa da, sanki böyük arzular ilə genişlənir.
O, günün müəyyən hissəsində dərslərinə hazırlaşır, həftədə iki gün musiqi dərslərinə, iki gün isə şahmat dərnəyinə gedir. Bundan əlavə, beynəlxalq olimpiada üçün onlayn hazırlıqlarda da iştirak edir. Valideynləri onun həm akademik, həm də yaradıcı inkişafına dəstək olmaq üçün əllərindən gələni edirlər.
Məsələ ilə əlaqədar təhsil eksperti Elçin Əfəndinin də fikrini öyrəndik. O bildirib ki, olimpiadalarda iştirakın maliyyələşdirilməsi iki qaydada həyata keçirilir: “Əgər Elm və Təhsil Nazirliyi hər hansı beynəlxalq olimpiadada iştirakla bağlı rəsmi tövsiyə verirsə, həmin şagirdlərin bütün xərcləri dövlət tərəfindən qarşılanır. Lakin nazirliyin tövsiyə etmədiyi, şəxsi təşəbbüslə qatılmaq istənilən digər olimpiadalarda isə xərclər şagirdlərin valideynləri tərəfindən ödənilir”.
Ekspert qeyd edib ki, bəzən hazırlıq və iştirak xərclərini tərəfdaş şirkətlər də üzərinə götürə bilir: “Məsələn, əvvəlki illərdə “Azercell” və digər şirkətlər bəzi fənlər üzrə hazırlıq prosesinin maliyyələşdirilməsində iştirak edib”.
Bütün bu uğurlara və parlaq istedadına baxmayaraq, balaca Sabirin beynəlxalq olimpiadaların final mərhələlərində iştirakı valideynlərinin üzərinə düşən maliyyə xərcləri səbəbindən hələ ki, reallaşmır. Hüquqşünas olmaq və Azərbaycanı layiqincə təmsil etmək arzusunda olan bu istedadın potensialının tam üzə çıxarılması üçün əlavə dəstəyə ehtiyacı var.
Bölmənin digər xəbərləri
