SOCAR: Hava şəraitinin ağır olmasına baxmayaraq, itkin düşən işçilərin helikopterlərlə axtarışı davam etdirilib VİDEO
Bakı, 9 dekabr, AZƏRTAC
Səhər saatlarından hava şəraitinin ağır olmasına baxmayaraq, Fövqəladə Hallar Nazirliyinin, o cümlədən də Azərbaycan Respublikası Dövlət Neft Şirkəti (SOCAR) tərəfindən “AZAL” QSC-dən sifariş olunan helikopterlər itkin düşmüş işçilərin axtarış işlərini davam etdirib.
AZƏRTAC xəbər verir ki, bu barədə dekabrın 9-da saat 11-də keçirilən mətbuat konfransında SOCAR-ın “Azneft” İstehsalat Birliyinin baş mühəndisi Balamirzə Ağarəhimov məlumat verib.
Qeyd edilib ki, küləyin sürəti çox olduğu üçün sualtı axtarışlar müvəqqəti olaraq dayandırılıb. Lakin həm “Neft daşları”, həm də “Günəşli” sahəsində ehtiyatda gəmilər saxlanılıb. Hər hansı bir məlumat daxil olduqda həmin gəmilər həmin əraziyə yaxınlaşacaqlar.
“Hazırda 5 gəmi yanğının söndürülməsinə cəlb olunub. 10 nömrəli özüldə avadanlığın quraşdırılması işləri hava şəraitindən asılı olaraq dünən yekunlaşdırıla bilməyib. Hazırda fontana qarşı “Boots&Coots” şirkətinin mütəxəssislərinin də iştirakı ilə iş planı hazırlanır. Bu plan FHN-in yanğınsöndürən gəmilərinin işinin daha da asanlaşmasını təmin edəcək”, - deyə B.Ağarəhimov bildirib.
Onun sözlərinə görə, cəsədləri sudan çıxarılan əməkdaşların üzərində xilasedici jiletlərin olmaması ilə bağlı sosial şəbəkələrdə yayılan görüntülər həqiqəti əks etdirmir.
Bölmənin digər xəbərləri
