“AĞDAŞ” QƏZETİNİN İLK NÖMRƏSİNİN NƏŞR OLUNMASINDAN 75 İL ÖTÜR
1936-cı ilin noyabrında ilk dəfə “Ağdaş pambıqçısı” adı ilə nəşrə başlayan “Ağdaş” qəzetinin 75 illik yubileyinin təntənəli şəkildə qeyd edilməsi ilə əlaqədar rayon icra hakimiyyətinin başçısı sərəncam imzalamış, müvafiq komissiya yaradılmış və tədbirlər planı təsdiqlənmişdir. Silsilə tədbirlər çərçivəsində Ağdaş Dövlət Humanitar Kollecində, rayon gənclər və idman idarəsində oxucularla görüşlər keçirilmiş, redaksiyada qəzetin ilk nömrələrindən, əməkdaşların fotoşəkillərindən ibarət sərgi təşkil olunmuşdur.
Redaktor Fariz Rüstəmov AZƏRTAC-ın müxbirinə bildirmişdir ki, ayda üç dəfə nəşr olunan “Ağdaş” qəzeti rayonun sosial-iqtisadi, mədəni həyatına geniş müdaxilə edərək müxtəlif mövzularda yazılar dərc edir, rayonun inkişafı üçün sözün gücündən istifadə edir, regionların sosial-iqtisadi inkişafı Dövlət Proqramı çərçivəsində Ağdaşda görülən işlərə dair yazılar verir. Qəzet bu mövzuda artıq 4 dəfə xüsusi buraxılış hazırlamış, ulu öndər Heydər Əliyevə həsr olunmuş “Şəxsiyyət”, “Lider və ümummilli lider” başlıqlı xüsusi nömrələri oxuculara təqdim etmişdir. Qəzetin bu günlərdə Dəhnəxəlil kənd sakini, yataq xəstəsi Ülkər Şərifova haqqında dərc etdiyi yazı geniş əks-sədaya səbəb olmuş və onun müalicəsi üçün rayonda xeyriyyə marafonu keçirilmişdir.
Redaksiya rayonda yas mərasimlərinin təşkili ilə bağlı müzakirələrin aparılması üçün müxtəlif sənət adamlarının iştirakı ilə bir il ərzində mütəmadi olaraq dəyirmi masalar keçirmişdir. Qəzet özünün 75 illik yubileyinə həsr olunmuş xüsusi buraxılış hazırlamışdır. Yubiley münasibətilə noyabrın ayının sonunda Ağdaşda ictimaiyyətin iştirakı ilə geniş tədbir keçiriləcəkdir.
İlk redaktoru Həmid İbrahimov olan “Ağdaş pambıqçısı” qəzeti 1936-38-ci illərdə dərc olunmuşdur. 1938-62-ci illərdə “Pambıq uğrunda mübarizə”, 1966-2003-cü illərdə “Əmək” adı altında çap olunan qəzet 2003-cü ildən rayon icra hakimiyyətinin orqanı kimi “Ağdaş” adlandırılmışdır.
Bölmənin digər xəbərləri
