Bakı, 29 oktyabr (AZƏRTAC). Meksikanın dünya şöhrətli Kankun kurort şəhərindən xoş xəbər alınmışdır. Bu günlərdə həmin şəhərdə Beynəlxalq Gimnastika Federasiyasının (FİG) 79-cu seçki konqresi başa çatmışdır. Azərbaycan Gimnastika Federasiyasının (AGF) baş katibi, Azərbaycan nümayəndə heyətinin tərkibində bu forumda iştirak etmiş Fərid Qayıbov Avropadan FİG Şurasına yenidən üzv seçilmişdir.

AZƏRTAC Gimnastika Federasiyasının mətbuat xidmətinə istinadla xəbər verir ki, Azərbaycan nümayəndəsi ikinci dəfə FİG-nin rəhbər orqanlarından birinin tərkibinə daxil olmuşdur. Onun namizədliyinin lehinə 49 nümayəndə səs vermişdir. Bu, 2008-ci ildə keçirilmiş əvvəlki seçkilərdə Fərid Qayıbovun topladığı səslərin sayından 14 səs çoxdur.

Səsvermənin yekunları elan ediləndən dərhal sonra FİG strukturuna yenidən üzv seçilmiş F.Qayıbov öz fikrini sosial şəbəkədə bölüşərək demişdir: “Mənim fikrimcə, bizim ümumi vəzifəmiz xüsusən yeni müstəqil dövlətlərin və inkişaf etməkdə olan ölkələrin milli federasiyalarına bərabərhüquqlu münasibətə nail olmaqdır. Güman edirəm ki, gələcəkdə qəbul edilən qərarlar gimnastikanın olimpiya proqramına daxil olan idman növü kimi rolunun möhkəmlənməsinə, dünya ictimaiyyətinin nəzərində Beynəlxalq Federasiyanın idman nüfuzunun və imicinin artmasına xidmət edəcəkdir”.

Beynəlxalq Gimnastika Federasiyasının ali rəhbərliyində ciddi dəyişikliklər olmamışdır. FİG prezidenti vəzifəsinə yenidən İtaliya nümayəndəsi Bruno Qrandi seçilmişdir. Fransalı Mişel Leqliz və Kanada nümayəndəsi Slava Korn vitse-prezident vəzifəsində qalmışlar. Üçüncü vitse-prezident vəzifəsinə Rusiya nümayəndəsi Vasili Titov seçilmişdir.

Üç texniki komitənin rəhbərliyi dəyişmişdir. Belə ki, bədii gimnastika üzrə texniki komitənin əvvəlki rəhbəri polşalı Mariya Şişkovskaya öz səlahiyyətlərini təhvil vermiş, onun əvəzinə əvvəllər bu komitənin üzvü olmuş rusiyalı Natalya Kuzmina seçilmişdir.

Kişi idman gimnastikası üzrə Texniki Komitənin prezidenti rumıniyalı Adrian Stoyka da öz vəzifəsini tərk etmişdir. Onun yerini amerikalı Stiv Batçer tutmuşdur. Bununla bərabər, Yeni Dünyanın digər nümayəndəsi Sveta Toni Keys dünya akrobatikasının idarəetmə sükanını belçikalı Rozi Timansa təhvil vermişdir.

Digər texniki komitələrin rəhbərləri - qadın idman gimnastikası üzrə Texniki Komitənin prezidenti Nelli Kim (Belarus) və tamblinq üzrə Texniki Komitənin prezidenti Horst Kunze (Almaniya) öz vəzifələrində qalmışlar.

Xatırladaq ki, Azərbaycan nümayəndə heyəti konqres çərçivəsində bir sıra görüşlər keçirmiş, o cümlədən 2014-cü ildə Bakıda keçiriləcək bədii gimnastika üzrə Avropa çempionatına hazırlıq məsələlərinə dair danışıqlar aparmışdır.