Balakənli kümçülər indiyədək qəbul məntəqəsinə 31 tondan çox yaş barama təhvil veriblər
Balakən, 20 iyun, Mustafa Dadaşov, AZƏRTAC
Builki mövsümdə Balakən rayonunda yaş barama istehsalının 35,4 tona çatdırılması qarşıya hədəf qoyulub. Barama yetişdirilməsi üçün 269 kümçü ilə müqavilə bağlanılıb, onlara Qax Damazlıq İpəkçilik Stansiyasında inkubasiya olunmuş 885 qutu, yəni 16,8 kiloqram ipəkqurdu paylanılıb. Hazırda rayonda istehsalçılardan yaş barama tədarükü davam edir. Kümçülər indiyədək rayondakı qəbul məntəqəsinə 31 ton 133 kiloqram yaş barama təhvil veriblər.
Balakən Dövlət Aqrar İnkişaf Mərkəzinin bitkiçilik sektorunun müdiri Şahin Rəhimli AZƏRTAC-ın bölgə müxbirinə bildirib ki, Qazma kəndindən Tahir Məmliyev hələlik qəbul məntəqəsinə rayon üzrə hamıdan çox - 490 kiloqram yaş barama gətirib. İtitala kəndindən Rəyyət Hüseynova bu günədək məntəqəyə 410,2 kiloqram, Qullar kəndindən Aybəniz Süleymanov 333,8 kiloqram, Sarıbulaq kəndindən Ramella Mollayeva isə 316,1 kiloqram yaş barama təhvil veriblər. Məntəqədə yaş baramanın qəbulu “Azəripək” MMC-nin tədarük üzrə mütəxəssisinin iştirakı ilə həyata keçirilir.
Bölmənin digər xəbərləri
