REGİONLAR


Qusarlı fermer bir gündə 50 tona yaxın kartof çeşidləyə bilən aqreqat düzəldib VİDEO

Qusar, 16 fevral, Elxan Yusifli, AZƏRTAC

Qusarlı fermer bir gündə 50 tona yaxın kartof çeşidləyə bilən aqreqat düzəldib.

AZƏRTAC-ın bölgə müxbiri xəbər verir ki, rayonun Yasab kəndində yaşayan 58 yaşlı Rəvayət Nəzərovun hazırladığı qurğu həm elektriklə, həm də mexaniki üsulla çalışır.

Sadə mexanizmlə işləyən qurğuda kartof diametri 800 millimetr olan barabana boşaldılır. Həmin baraban fırlandıqca kartoflar ölçüsünə uyğun dəliklərdən xüsusi yuvalara tökülür. Bu aqreqat kartofu 35, 36-55, 56-85 millimetr və 85 millimetrdən böyük olmaqla 4 ölçüdə çeşidləyir.

Rəvayət Nəzərov 8 ay ərzində düzəltdiyi kartof çeşidləyici aqreqatın təsərrüfatçıların əməyini xeyli yüngülləşdirəcəyini bildirir. Belə ki, 10 işçi əl əməyi ilə bir gündə cəmi 3 ton kartof çeşidləyə bilir. Yeni aqreqat vasitəsilə şəraitdən və işçi qüvvəsindən aslı olaraq 8 saatlıq iş rejimində 20 tondan 48 tona kimi kartofu çeşidləmək mümkündür. Bu zaman aqreqata cəmi 2 manat dəyərində elektrik enerjisi sərf olunur.

Dəmir konstruksiya üzərində quraşdırılan aqreqatın hissələrini çıxarmaq, dəyişdirmək və təmir etmək mümkündür. Üç metrə yaxın uzunluqdakı qurğunun hündürlüyü 1,6 metr, çəkisi isə 180 kiloqramdır. Çeşidləyicinin barabanı 1 dəqiqədə 8 dövrə vurur.

Aqreqatın yerdəyişməsini bir nəfər həyata keçirir. Çeşidləmə prosesində isə 4 işçi qüvvəsi tələb olunur.

“Əllə görülən iş iqtisadi cəhətdən səmərəli deyil. Bu, əlavə vaxt və vəsait itkisinə səbəb olur. Bu aqreqat vasitəsilə kartof istehsalçıları məhsullarını tez bir zamanda çeşidləyib bazara çıxara bilər. Qurğunun adını qısa olaraq EKÇM adlandırmışam. Yəni elektrik kartof çeşidləyici maşın. Bütün detallarını özüm düzəltmişəm. Bu aqreqatın təsərrüfat sahibləri üçün faydalı olacağını düşünürəm”, - deyə R.Nəzərov bildirib.

Mütəxəsis düzəltdiyi aqreqatı kartof istehsalçılarına icarəyə verəcək. Çeşidləyici maşının bir günlük icarə haqqını 300 manat müəyyənləşdirib.

Yasab kənd sakini düzəltdiyi aqreqatı patentləşdirmək üçün müvafiq dövlət qurumlarına müraciət edib.

Qusarda tanınan fermerlərdən olan Rəvayət Nəzərov Azərbaycan Kənd Təsərrüfatı İnstitutunda aqronomluq ixtisası üzrə təhsil alıb. Seleksiya işinin həvəskarı olan R.Nəzərov toxumçuluq və tingçilik təsərrüfatının sahibidir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.