Bakı, 10 yanvar, G.Mahmudlu, N.Huşiməndi, AZƏRTAC 

Prezident İlham Əliyevin müvafiq Sərəncamı ilə 2020-ci ilin “Könüllülər ili” elan edilməsi ölkəmizdə tarixi könüllülük ənənələrinə verilən yüksək dəyərdir. Ölkə başçısının Sərəncamı son dövrlərdə genişlənən könüllülük hərəkatlarının işinə bir stimul verəcək, yeni könüllülük fəaliyyətləri üzrə proqramların başlanılmasına, könüllülük təsisatlarının formalaşmasına da zəmin yaradacaq. Gənclər “Könüllülər ili”ndə mövcud olan, o cümlədən beynəlxalq və yerli miqyaslı könüllülük fəaliyyətlərinin işində daha fəal iştirak edəcəklər. “Könüllülər ili” gənclərdə böyük bir marağa səbəb olacaq.

AZƏRTAC xəbər verir ki, bunu Vətəndaşlara Xidmət və Sosial İnnovasiyalar üzrə Dövlət Agentliyinin Könüllülərlə iş sektorunun müdiri Sahil Məmmədli deyib.

S.Məmmədli bildirib ki, könüllülük öz asudə vaxtını və əməyini cəmiyyətin və dövlətin rifahı naminə təmənnasız şəkildə səfərbər etməkdir: “Könüllülük alturist və özlüyündə prososial fəaliyyətdir. Həmin fəaliyyətə qoşulan gənclər üçün ilk növbədə məsuliyyətli vətəndaşlıq hissi aşılanır. Yəni gənclərimiz öz ekoloji, mədəni, hüquqi, ictimai məsuliyyətlərini başa düşürlər. Bu fəaliyyət özlüyündə gələcək nəsillərin yetişdirilməsinə, formalaşdırılmasına böyük təsir göstərir. Xüsusi vurğulamaq lazımdır ki, könüllülüyün ikinci əsas komponenti də fərdi və peşəkar inkişafa verdiyi töhfədir. Könüllülük fəaliyyətinə qoşulan gənclər gələcəkdə ixtisaslı və peşəkar kadr kimi formalaşırlar. İxtisaslaşmış könüllülük təsisatlarının işinə qoşulan könüllülərimiz həmin ixtisas üzrə peşəkar biliklərə yiyələnir, onlara dövlətçilik, vətənpərvərlik hissi aşılanır və nəticədə həmin gənclər öz məsuliyyətlərini başa düşən faydalı insanlara çevrilirlər. Bir sözlə, gənclər üçün könüllülük fəaliyyətinin əsas mahiyyəti, onlarda fərdi və peşəkar yanaşmanın formalaşdırılmasıdır, eyni zamanda, onların məsuliyyətli insana çevrilməsidir. Gənclərimiz könüllülük fəaliyyətinə qoşulmaqla sosiallaşır, dövlət qurumlarının işində, cəmiyyətin inkişafı naminə həyata keçirilən faydalı layihələrdə daha yaxından və fəal iştirak edir, ətraflarında baş verən hadisələrə biganə qalmayan, məsuliyyətli insanlar kimi yetişirlər”.

Agentliyin sektor müdiri “ASAN xidmət”i könüllülərsiz təsəvvür etməyin mümkünsüzlüyünü ifadə edib: “Elə 2012-ci ildə ilk “ASAN xidmət” mərkəzinin açılışı zamanı Prezident İlham Əliyev əməkdaşlarla yanaşı, mərkəzdə fəaliyyət göstərən könüllülərlə də görüşüb. Bu görüş əslində ölkəmizdə mövcud olan könüllülük fəaliyyətinin geniş bir hərəkata çevrilməsinə stimul verib. 15 nəfərlə fəaliyyətə başlayan “ASAN Könüllüləri” ailəsinin hazırda 22 mindən çox üzvü var. “ASAN xidmət” dövlət xidmətləri sahəsində könüllülük fəaliyyəti üzrə modeli formalaşdırmaqla yanaşı, cəmiyyətin müxtəlif sahələrində ekoloji, sosial, mədəni, hüquqi istiqamətlərdə layihələrin icra olunmasına çoxmilli könüllülük dəstələri cəlb edib. Bu gün bizim ekoloji istiqamətdə həyata keçirdiyimiz “Yaşıl ASAN”, uşaqların müdafiəsi sahəsində icra olunan “ASAN məktub”, mədəniyyət sahəsində könüllülərin fəal iştirakına təşviq edən “Mədəniyyət carçısı” proqramlarını, gənclərdə hərbi vətənpərvərlik hissinin aşılanması, artırılması istiqamətində icra olunan “Əsgərə məktub” layihəsini, “Hərbiyyə” vətənpərvərlik düşərgələrini qeyd etmək yerinə düşər. 2020-ci ildə, yəni “Könüllülər ili”ndə “ASAN xidmət” məhz bu istiqamətdə olan layihələrin icrasına könüllüləri daha çox cəlb edəcək. “ASAN xidmət” mərkəzlərində çalışan könüllülərin bilik və bacarıqlarının artırılması üçün müxtəlif təlim proqramları, layihələr, yay məktəbləri, düşərgələr həyata keçiriləcək. Eyni zamanda, əsas istiqamətlərimizdən biri də regionlarda yaşayan gənclərimizi könüllülük fəaliyyətinə cəlb etməklə onların bilik və bacarıqlarının artırılmasına, məsuliyyətli insan kimi yetişdirilməsinə töhfə vermək olacaq. Həmçinin “ASAN xidmət” innovativ layihələrin əsas icraedicisi olduğu üçün könüllülük sahəsində də innovativ proqramlar reallaşdıracağıq”.

Sahil Məmmədlinin sözlərinə görə, fəal yaşlanmanın təşviq olunması məqsədilə pensiya yaşına çatmış şəxslərin “ASAN xidmət” mərkəzlərində könüllü fəaliyyəti ilə məşğul olması üçün imkanlar var. Eyni zamanda, fiziki məhdudiyyətli gənclər üçün inklüziv könüllülük proqramı mövcuddur. Həmin proqram fiziki məhdudiyyətli gənclərin inkişafına mühüm töhfə verir.

“Könüllülüyün yaşı, məhdudiyyəti yoxdur. Könüllülük yaşlı nəslin fəal yaşlanmasında, gənclərin isə potensialından daha səmərəli istifadə edilməsi və onların bilik və bacarıqlarının aşkarlanmasında önəmlidir”, - deyə agentliyin nümayəndəsi diqqətə çatdırıb.