MƏDƏNİYYƏT
Tanınmış rəssamın yeni kataloqu nəşr edilib
Bakı, 13 may, AZƏRTAC
Əməkdar rəssam Arif Məhərrəmovun əsərlərindən ibarət nəfis tərtibatlı kataloq Azərbaycan və ingilis dillərində “Yeni Gallery” Bakı İncəsənət Mərkəzi tərəfindən nəşr edilib.
AZƏRTAC xəbər verir ki, rəssam Eldar Ağamalovun layihə rəhbəri olduğu kataloqun dizaynı Mərkəzin baş direktoru Rafael Gülməmmədliyə məxsusdur. Kataloqun məsul katibi Nuriyə Mirzəzadə, “Ön söz” müəllifi Məlahət İsmayılqızıdır.
Rəssam Arif Məhərrəmovun yaradıcılığı barədə sənətsevərlərə geniş məlumat çatdıran kataloqda sənətkarın Bakı, İstanbul və Riqada çəkdiyi bir sıra maraqlı tablolarının, yağlı boya və qrafika əsərlərinin reproduksiyası əksini tapıb.
Qeyd edək ki, tanınmış rəssam, rejissor Arif Məhərrəmov 1948-ci il avqustun 5-də qədim Oğuz yurdu Göyçədə anadan olub. Əzim Əzimzadə adına Azərbaycan Dövlət Rəssamlıq Məktəbini (1972) və Ümumittifaq Dövlət Kinematoqrafiya İnstitutunun rəssamlıq fakültəsini (1981) müvəffəqiyyətlə bitirib, “Azərbaycanfilm” kinostudiyasında bədii filmin quruluşçu rəssamı, həmçinin cizgi (animasiya) filmlərinin ssenari müəllifi, rəssamı və rejissoru kimi çalışıb.
O, Azərbaycan və Latviya Rəssamlar ittifaqının üzvüdür. Rəngkarlıq əsərləri dəfələrlə respublikamızda və Riqa, Moskva, London, Helsinki və Köln şəhərlərində keçirilən sərgilərdə nümayiş olunub. Yaradıcılıq sahəsindəki xidmətlərinə görə Latviya Seyminin qərarı ilə ona ölkənin fəxri vətəndaşı adı verilib.
2000-ci ildə ulu öndər Heydər Əliyevin Sərəncamı ilə Arif Məhərrəmov “Əməkdar rəssam” fəxri adına layiq görülüb.
“Azərbaycanfilm” kinostudiyasında rəssam kimi çalışdığı bədii filmlər arasında “İşgüzar səfər” (1982), “Qocalar, qocalar...” (1982), “Yeddi gözəl” (1982), “O dünyadan salam” (1991), “Qala” (2008) və digər filmlər kinosevərlərə yaxşı tanışdır. Həmçinin onun balaca tamaşaçılar üçün rejissor və rəssam kimi ekranlaşdırdığı animasiya filmləri - “Münəccimin şagirdi” (1983), “Yatmaq vaxtıdır” (1984), “Gəldi kosa” (1988), “Qaravəlli” (1989), “Kitabi - Dədə Qorqud. Səkrəyin dastanı” (1990), “Basat və Təpəgöz”(2003), “Molla Nəsrəddin lətifələri” (1993) və s. ölkəmizdə bu sahənin inkişafına xüsusi töhfə verib.
Arif Məhərrəmov istedadlı rəssam olmaqla yanaşı, həm də Azərbaycanda ilk dəfə 3D formatında animasiya filmləri çəkən multiplikator-rejissor kimi də məşhurlaşıb. Onun çəkdiyi animasiya filmləri Türkiyədə və İsveçdə keçirilən kinofestivallarda milli kinomuzu layiqincə təmsil edib. Arif Məhərrəmovun bu sahədə son uğurlarından biri də 2018-ci ildə müasir texnologiya ilə çəkdiyi “Mənim balaca Şahzadəm” animasiya filmidir. Antuan de Sent-Ekzüperinin məşhur əsərinin motivləri əsasında "Azanfilm” Animasiya Studiyasında istehsal olunan həmin film 2020-ci ildə Cənubi Koreyada keçirilən kinofestivalda “Parlaq gələcək” nominasiyası üzrə qalib hesab edilərək birinci mükafata layiq görülüb.