ELM VƏ TƏHSİL


Ural Federal Universitetinin rektoru BDU-da olub

Bakı, 13 sentyabr, AZƏRTAC

Bakı Dövlət Universitetində (BDU) Ural Federal Universitetinin rektoru Viktor Kokşarovla görüş keçirilib.

BDU-dan AZƏRTAC-a bildirilib ki, görüşdə rektor Elçin Babayev sentyabrın 11-də Bakı Biznes Mərkəzində tərəflər arasında imzalanan anlaşma memorandumunun əhəmiyyətini qeyd edərək onun müəllim və tələbələrin gələcək inkişafında xüsusi rol oynayacağını bildirib. BDU tərəfindən təhsil, tədqiqat, innovasiya və elmi biliklərin kommersiyalaşdırılması, sosial həyat və beynəlxalq əlaqələrin daha da təkmilləşdirilməsi istiqamətində görülən işlərdən danışan rektor Elçin Babayev, eyni zamanda, onun 100 illik yubileyi haqqında məlumat verib. Yubiley tədbirlərinin UNESKO-nun Parisdəki Baş qərargahında və Vyanada Azərbaycan Mədəniyyət Mərkəzində qeyd olunduğunu diqqətə çatdıran rektor ölkədə və xaricdə çoxsaylı elmi, mədəni, kütləvi tədbirlərin keçirilməsinin nəzərdə tutulduğunu bildirərək qonaqları noyabr ayında keçiriləcək 100 illik yubileyə dəvət edib.

Təbiət, humanitar elmlər və iqtisadiyyat sahəsi üzrə 35 mindən çox tələbəsi olan Ural Federal Universiteti haqqında məlumat verən rektor Viktor Kokşarov onun müasir ali təhsil ocağı kimi beynəlxalq əlaqələrdə çoxşaxəli sferalara malik olduğunu bildirib. Rektor BDU ilə imzalanan memorandumun əməkdaşlığın inkişafına verəcəyi faydalardan danışıb.

Görüşdə “ikili diplom”, beynəlxalq reytinq təşkilatları ilə əməkdaşlıq məsələləri də müzakirə edilib.

Qeyd edək ki, İqtisadiyyat naziri Şahin Mustafayev və Rusiyanın Sverdlovsk vilayətinin qubernatoru Yevgeni Kuyvaşevin rəhbərliyi ilə keçirilən Azərbaycan-Rusiya nümayəndə heyətlərinin işgüzar görüşü zamanı imzalanan anlaşma memorandumunda pedaqoji və elmi işçilərin, tələbə, magistr və doktorantların mübadiləsi, BDU tələbələrinin Ural Federal Universitetinin doktorantura proqramlarına qəbul edilməsi, müəllimlərin ixtisaslarının artırılmasına qarşılıqlı yardım, qabaqcıl inkişaf metodları sahəsində təcrübə mübadiləsi, bu ali təhsil müəssisəsinin Azərbaycanşünaslıq Mərkəzi ilə əməkdaşlıq, ikitərəfli birgə elmi simpozium, seminar və konfransların təşkili, qarşılıqlı maraq doğuran proqram və layihələrdə birgə iştirak nəzərdə tutulur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.