Vəkillər Kollegiyası Mingəçevirdə ödənişsiz hüquqi yardım günü təşkil edib
Bakı, 7 avqust, AZƏRTAC
“Sosial Hüquqların Araşdırılması” İctimai Birliyinin, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının və Vəkillər Kollegiyasının təşkilatçılığı ilə Mingəçevirdə əhaliyə ödənişsiz hüquqi yardım xidmətləri göstərilib.
Vəkillər Kollegiyasının Rəyasət Heyətindən AZƏRTAC-a bildiriblər ki, layihənin əsas məqsədi benefisiarların sosial hüquqlarla (əmək, tibb, sosial təminat, ailə, təhsil və sair) bağlı məlumatlandırılmasından, regionlarda “Ödənişsiz hüquqi yardım günləri”nin təşkil edilməsindən, sosial məsələlər üzrə hüquq klinikasında benefisiarlara ödənişsiz hüquqi yardım xidmətlərinin göstərilməsinin davam etdirilməsindən ibarətdir.
“Ödənişsiz hüquqi yardım” günündə Azərbaycan Respublikası Vəkillər Kollegiyasının üzvləri Mais Əliyev və Aqşin Atalızadə tərəfindən sosial müdafiəyə xüsusi ehtiyacı olan əhalinin müraciətlərinə baxılıb. Vətəndaşlar aidiyyəti hüquqi məsləhət aldıqdan sonra müvafiq orqanlara yönləndiriliblər.
Əhalinin müraciətləri əsasən ünvanlı sosial yardımın verilməsi, alimentin ödənilməməsi, əlilliyin müəyyənləşdirilməsi, bank krediti ödənişləri, pensiya və sosial müavinətlərin verilməsi, məşğulluq, əmək xəsarətlərinə görə ödənişlərin verilməsi və sair ilə bağlı olub.
Müraciətlərə müvafiq olaraq yeddi iddia ərizəsi yazılıb, müxtəlif orqanlara doqquz sorğu ünvanlandırılıb. Eləcə də 51 nəfərə şifahi olaraq hüquqi məsləhət verilib.
Bölmənin digər xəbərləri
