® Yeni əsrin idman növünün gələcəyi böyükdür
Bakı, 16 aprel, Nicat Məmmədov, AZƏRTAC
Kiberidman yarışları son illərdə bütün dünyada populyardır. Xüsusilə gənclər asudə vaxtlarını kiberidman yarışlarında iştirak etməklə keçirirlər. Peşəkar idmanda olduğu kimi, kiberidmanda da məşq edirlər, hazırlaşırlar. Fərq yalnız mübarizənin virtual şəkildə baş tutmasıdır. Ötən il bütün dünyada pandemiya ilə yadda qaldı. Karantində idman yarışları təxirə salındığı zaman kiberidman üzrə turnirlər öz axarıyla keçirildi. Tarixən insanlar kompüter oyunlarına böyük maraq göstərib. İndi bu oyunlarda həm də maddi baxımdan qazanc əldə etmək mümkündür.
Bu sözləri AZƏRTAC-a müsahibəsində ölkəmizdə kiberidman üzrə yarışlar təşkil edən “Gaming League Azerbaijan”ın rəhbəri Adil Mahmudov deyib. Müsahibəni təqdim edirik.
- “Kiberidman kompüter oyunudur” demək düzgündür?
- Kiberidman Azərbaycanda idman növü kimi rəsmən təsdiqlənib. Buna görə kiberidman adi kompüter oyunu deyil. Bu peşəkar səviyyədə virtual idman yarışıdır. Amma bizim kompüter avadanlığımız peşəkar səviyyədədir. Bu adi kompüter məkanlarında gördüyünüz deyil. Kiber idman üzrə milli və beynəlxalq yarışlar təşkil olunur. Bu artıq idmanın bir növünə çevrilib. Peşəkar idmanda olduğu kimi bizim yarışlarda da hakimlər - xüsusi nəzarət edən şəxslər olur. Kiberidman son illər dünyada böyük uğurlar qazanıb. 2019-cu ilə qədər olan statistikalara görə, 400 milyondan artıq insanın marağını qazanan kiberidman sahəsinin populyarlığı bu gün də artmaqdadır. Kiberidman 2022-ci ildə baş tutacaq 19-cu Asiya Oyunlarının proqramına sınaq kimi daxil edilib. Hətta gələcəkdə Yay Olimpiya Oyunlarının proqramına əlavə olunacağı ilə bağlı müzakirələr var.
- Rəhbəri olduğunuz “Gaming League Azerbaijan”ın başlıca məqsədi nədən ibarətdir?
- Azərbaycanda 2019-cu ildə yaranmış və kiberidman turnirləri həyata keçirən “Gaming League Azerbaijan” bu günədək 40-dan çox kiber idman çempionatı təşkil edib. Kiber idman mədəniyyətini inkişaf etdirmək məqsədilə yaradılan bu liqanın prioritet məqsədləri Azərbaycanda beynəlxalq səviyyədə idman oyunlarının inkişaf edilməsi, həm yerli, həm də beynəlxalq tədbirlərin keçirilməsi üçün lazımi şəraitin yaradılmasıdır. Kompüter oyunları üzrə Milli Çempionatlar təşkil olunur.
Ali Baş Komandanın rəhbərliyi altında ordumuzun Vətən müharibəsində tarixi qələbəsindən sonra biz “Xarı Bülbül” adlı beynəlxalq yarış keçirdik. Səkkiz ölkənin iştirak etməsinə baxmayaraq, bu turnir ölkə xaricində böyük maraqla qarşılandı. Xarici federasiyalar yarışın adının niyə məhz “Xarı Bülbül” adlandırıldığını soruşurdular. Kiberidman həm də idmanın bu növündə təbliğatımızdır. Martda “Nizami Gəncəvi ili”nə həsr olunan “Xəmsə” adlı beynəlxalq yarış keçirildi. Bütün iştirakçı ölkələr Azərbaycanda “Nizami Gəncəvi ili”nin qeyd olunduğunu öyrəndi.
-Kompüter oyunlarının insana zərərli olduğu deyilir. Bu fikirlə razısınız?
-Artıq içiləndə su belə zərərli ola bilər. Bu mənada normal qaydada kompüter oyunlarından istifadə etmək ziyanlı deyil. Bununla həm də gələcəkdə beynəlxalq arenada ölkənizi təmsil etmək hüququ qazanırsan. Kiberidman artıq milyonlarla insanın həyat tərzinə çevrilib. Digər sahələrdə olduğu kimi, insanlar kiberidman vasitəsi ilə də karyera yüksəlişinə nail ola bilir. Dünya praktikasında kiber idman ali məktəblərdə tədris olunur.
-Kiberidmanda belə böyük məbləğin olması təəccüblü deyil?
-Cavid Qurbanovun keçdiyi GMT Esports klubu “Qız Qalasının keşikçiləri” adlanır. 25 min manat bizim kiber idmanımız üçün böyük məbləğdir. Amma Avropada daha böyük transferlər var. Artıq kiberidman futbol və digər növlərdə olduğu kimi transferlərlə gündəmə gəlir. Klublar güclü geymer-oyunçularla müqavilə imzalayır. Bizim təşkilat mütəmadi olaraq gənclərə dəstək məqsədi ilə turnirlər keçirir. Özünü yaxşı göstərən geymerlərlə peşəkar müqavilə imzalanır, onların inkişafına şərait yaradılır. Kiberidman həm də gənclərin asudə vaxtının səmərəli keçirilməsinə kömək edir. Pis vərdişlərlə məşğul olmurlar. 3-4 il əvvəl oyunçular başqa ölkələrdəki yarışlarla maraqlanırdı. İndi artıq öz təşkilatımız və milli liqalarımız var.
Bölmənin digər xəbərləri
