"Qarabağ"a iki qol vuran futbolçu: Bu qələbə yolun başlanğıcıdır
Bakı, 23 oktyabr, AZƏRTAC
“Qarabağ”la matçda komandamızın məqsədi sadəcə qalib gəlmək idi. Daha çox qol fürsəti yaratmalı və onları dəyərləndirməli idik. Bu üç xal bizim üçün çox önəmlidir.
AZƏRTAC xəbər verir ki, bu sözləri İspaniyanın “Atletik” klubunun futbolçusu Qorka Quruseta UEFA Çempionlar Liqasının əsas mərhələsində "Qarabağ"ı 3:1 hesabı ilə üstələdikləri III tur oyunu barədə danışarkən deyib.
Komandasının iki qolunun müəllifi olan hücumçu nəticəyə görə xoşbəxt olduğunu bildirib: “Çempionlar Liqasında qalib gəlmək və qol vurmaq mənim üçün arzu idi. Daha sakit və təmkinli olmağa çalışdım. Çünki qol vurmaq üçün fürsətin nə vaxt gələcəyini bilmirsən. İkinci qolum daha təmiz və gözəl alındı. Mikel Xaureqisar yaxşı ötürmə verdi. Topa ilk toxunuşdan dərhal sonra zərbə vurmağa qərar verdim. Ümid edirəm ki, bu qələbə yolun başlanğıcıdır və eyni performansı növbəti matçlarda da göstərəcəyik”.
Qeyd edək ki, ilk 3 turdan sonra aktivində 6 xal olan “Qarabağ” 13-cü pillədə qərarlaşıb. Bilbao klubu isə 3 xalla 21-ci yerdədir.
Bölmənin digər xəbərləri
