® “Ziraat Bank Azərbaycan” bərpaolunan yaşıl enerji sahəsində iri layihə maliyyələşdirilməsini həyata keçirir
“Ziraat Bank Azərbaycan” ölkədə bərpaolunan enerji sahəsində həyata keçirilən ən iri layihələrdən birini maliyyələşdirir.
Bank COP29 çərçivəsində bank sektorunun iqlim maliyyəsi istiqamətində bərpaolunan enerji və oxşar dayanıqlı layihələr üzrə üzərinə götürdüyü öhdəlikləri çərçivəsində fəaliyyətini davam etdirir.
Bankın korporativ müştərisi olan “Clean Energy Cəbrayıl” MMC tərəfindən Cəbrayıl rayonunda günəş enerjisi stansiyasının qurulması nəzərdə tutulur. Layihə çərçivəsində “Ziraat Bank Azərbaycan” tərəfindən 30 milyon manat məbləğində kredit ayrılıb. Bu layihə xüsusilə işğaldan azad olunmuş ərazilərdə yaşıl enerji potensialının reallaşdırılması baxımından mühüm əhəmiyyət daşıyır.
“Clean Energy Cəbrayıl” MMC AGEC MMC-nin törəmə müəssisəsidir. AGEC MMC və törəmə müəssisələri ölkənin dayanıqlılıq strategiyasına uyğun olaraq yaşıl enerji istehsalı sahəsində investisiyaların həyata keçirilməsi istiqamətində fəaliyyət göstərirlər.
“Ziraat Bank Azərbaycan” tərəfindən ayrılacaq kredit real sektorun inkişafına, xüsusilə dayanıqlı və ekoloji təmiz enerji layihələrin genişlənməsinə verdiyi önəmin növbəti göstəricisidir.
Bank bərpaolunan enerji və dayanıqlı inkişaf istiqamətində layihələrin maliyyələşdirilməsini strateji prioritetlərindən biri kimi müəyyən edib. “Ziraat Bank Azərbaycan” bu sahədə həyata keçirilən təşəbbüsləri dəstəkləməklə ekoloji tarazlığın qorunmasına, enerji mənbələrinin şaxələndirilməsinə və ölkənin uzunmüddətli iqtisadi inkişafına töhfə verməyi hədəfləyir.
“Ziraat Bank Azərbaycan” ASC Türkiyə Respublikasının 162 illik tarixə malik “Ziraat Maliyyə Qrupu”nun üzvüdür. Bank Azərbaycan Respublikasının Mərkəzi Bankı tərəfindən verilmiş 30.12.2014-cü il tarixli 255 nömrəli lisenziya əsasında fəaliyyət göstərir. Korporativ və pərakəndə bankçılıq sahəsində müasir məhsul və xidmətləri Bakı, Gəncə, Sumqayıt və Naxçıvan şəhərlərində yerləşən 11 filialı və Quba şəhərində yerləşən 1 şöbəsi ilə yanaşı, rəqəmsal platformalar üzərindən də müştərilərə xidmət göstərir.
Bankın məhsul və xidmətləri barədə daha ətraflı məlumatı bankın “Instagram”, “X-platforması”, “Linkedin”, “YouTube” sosial media hesablarından və ya *9229 qısa nömrəsinə zəng edərək əldə edə bilərsiniz.
Bölmənin digər xəbərləri
