Abbas Abbasov: Bakı Təşəbbüs Qrupu müstəmləkəçiliyə qarşı mübarizədə qlobal platforma rolunu gücləndirir
Bakı, 3 oktyabr, AZƏRTAC
Bakı Təşəbbüs Qrupunun (BTQ) İcraçı direktoru Abbas Abbasov Simon Bolivar İnstitutunun Xalqlar arasında Sülh və Həmrəylik Fondunun Prezidenti Blanka Qomesin dəvəti ilə iştirak etdiyi “Müstəmləkəçilik, Neokolonializm və onun nəticələri” adlı beynəlxalq konfransda çıxış edib.
Bu barədə AZƏRTAC-a Bakı Təşəbbüs Qrupundan məlumat verilib.
Bildirilib ki, A.Abbasov çıxışında BTQ-nin missiyasından, müstəmləkəçilik və neokolonializmə qarşı fəaliyyətindən, beynəlxalq əməkdaşlıq və dekolonizasiya sahəsində əldə etdiyi nailiyyətlərdən danışıb. O, təşkilatın beynəlxalq ictimaiyyətə (neo) kolonializmin mövcudluğunu çatdırmaqla, müstəmləkəçilik və neokolonializmin aradan qaldırılması, dekolonizasiya hüququnun təşviqi və müstəmləkə hökmranlığından əziyyət çəkən xalqlara dəstək göstərilməsi istiqamətində fəaliyyət göstərdiyini qeyd edib
İcraçı direktor vurğulayıb ki, Azərbaycan 2019-2023-cü illərdə Qoşulmama Hərəkatına uğurla sədrlik edib. 2023-cü ilin iyul ayında Qoşulmama Hərəkatının Koordinasiya Bürosunun Nazirlər Toplantısı çərçivəsində Bakıda təşkil olunan “Müstəmləkəçiliyin tamamilə aradan qaldırılmasına doğru” adlı beynəlxalq konfransda, BTQ-nin yaradılması barədə qərar qəbul olunub. Təşkilat beynəlxalq hüquq və insan hüquqları prinsiplərinə sadiqlik nümayiş etdirir, fəaliyyətini müstəmləkəçilik və neokolonializmin ləğvinə, dekolonizasiya hüququnun təşviqinə, həmçinin müstəmləkə əsarəti altında olan xalqlara dəstək verməyə həsr edib.
BTQ qlobal dekolonizasiya hərəkatında beynəlxalq səviyyədə nüfuzlu platforma kimi fəaliyyət göstərir. Son iki il ərzində BMT-nin Nyu-York, Cenevrə və Vyana qərargahlarında, həmçinin Romada, İstanbulda və Bakıda 40-dan artıq beynəlxalq konfrans və yüksəksəviyyəli tədbir təşkil edib. Tədbirlər müstəmləkəçiliyin ekoloji, mədəni, sosial, təhsil və səhiyyə sahələrinə təsirinə həsr olunub. Siyasi liderlər, alimlər, beynəlxalq hüquq üzrə ekspertlər, xüsusi məruzəçilər və müstəmləkə əsarəti altında olan ərazilərin vətəndaş cəmiyyəti təşkilatları bu tədbirlər çərçivəsində bir araya gətirilərək geniş dialoq platforması yaradılıb.
A.Abbasov BTQ-nin əsas nailiyyətlərindən biri kimi 2024-cü ilin iyulunda Bakıda keçirilmiş Millətçi və Müstəqillik Hərəkatlarının Birinci Konqresini, Beynəlxalq Dekolonizasiya Cəbhəsinin yaradılmasını və müstəmləkə hərəkatlarının səsini birləşdirən təsis bəyannaməsini vurğulayıb. Eyni zamanda, BTQ tərəfindən hazırlanmış hesabatın BMT Baş Katibi tərəfindən 2025-ci il üçün təqdim edilən “Afrika Mənşəli Şəxslər üçün Beynəlxalq Onillik Fəaliyyət Proqramı”nda qeyd olunması da diqqətə çatdırılıb.
Abbasov bildirib ki, BTQ BMT Baş Assambleyasının sessiyaları, Xüsusi Dekolonizasiya Komitəsi (C24) və Dördüncü Komitəsi (C4), Afrika Mənşəli Şəxslərin Daimi Forumu, BMT İnsan Hüquqları Komitəsi və BMT İnsan Hüquqları Şurası ilə əməkdaşlıq çərçivəsində yan tədbirlər təşkil edib və substantiv dialoqa öz töhfəsini verib. Həmçinin COP29 çərçivəsində BTQ bir sıra tədbirlər keçirərək müstəmləkəçiliyin dağıdıcı ekoloji təsirlərini diqqət mərkəzinə gətirib.
Bununla yanaşı, Bakı Təşəbbüs Qrupu analitik mərkəz kimi fəaliyyət göstərərək müstəmləkəçilik və dekolonizasiya mövzularında yüksəksəviyyəli tədqiqatlar və ekspert təhlilləri hazırlayır. İndiyədək qurum tərəfindən hesabatlar, jurnallar və kitablar da daxil olmaqla 20-dən artıq nəşr işıq üzü görüb. Bu nəşrlər arasında müstəmləkə ərazilərinin idarə olunması üzrə beynəlxalq ekspert Korlayl Korbinin müəllifi olduğu “Fransız müstəmləkəçiliyinin təkamülü: Siyasi və konstitusional təhlil” əsəri xüsusi əhəmiyyət daşıyır.
O qeyd edib ki, BTQ müstəmləkə əsarəti altında qalan xalqlara dəstək verməkdə mühüm rol oynamağa davam edir və Azərbaycan bu baxımdan müstəqillik və azadlıq yolunda mübarizə aparan xalqlar üçün qlobal platforma rolunu oynayır.
Bölmənin digər xəbərləri
