ABF-nin vitse-prezidenti: Basketbolçularımız İslamiadada hər oyuna qələbə üçün çıxacaqlar
Bakı, 5 noyabr, AZƏRTAC
Ümid edirəm ki, qarşıya qoyulan məqsədlərə nail olar və medalçılar sırasında yer alarıq.
Bu sözləri AZƏRTAC-a açıqlamasında Azərbaycan Basketbol Federasiyasının (ABF) vitse-prezidenti Fərrux Mahmudov Səudiyyə Ərəbistanının Ər-Riyad şəhərində keçirilən VI İslam Həmrəyliyi Oyunlarında mübarizə aparacaq qadınlardan ibarət 3x3 basketbol millisinin şansları barədə danışarkən deyib.
O, Azərbaycan millisinin qrupdakı rəqiblərini dəyərləndirib: “Fikrimcə, qrupda liderlik uğrunda əsas mübarizə qardaş ölkə Türkiyə yığması ilə olacaq. Basketbol ənənələri və oyun zəkası baxımından ən güclü rəqib də məhz bu komandadır. Fiziki gücün hesabına basketbol oynamağı sevən Kot d`İvuar da önəmli rəqibdir, bu komandanı keçmək üçün daha intizamlı və aqressiv oyun lazım olacaq. Düşünürəm ki, ev sahibi Səudiyyə Ərəbistanına qarşı matçda aşkar favorit olmağımıza rəğmən, rəqibi ciddiyə almalı və erkən qələbə qazanmağa çalışmalıyıq”.
Federasiya rəsmisinin sözlərinə görə, millinin əsas oyunçularından biri sayılan Arika Karterin zədə səbəbindən turnirdə iştirak etməməsi ciddi itki hesab oluna bilər: “Buna baxmayaraq, qızlarımızın sona qədər mübarizə aparacaqlarına tam əminəm. Onlar döyüşkən xarakterə malikdirlər və hər oyunda qələbə üçün meydanda olacaqlar”.
Qeyd edək ki, İslamiadada 3x3 basketbol yarışları noyabrın 17-də və 18-də keçiriləcək.
Bölmənin digər xəbərləri
