ABŞ HÖKUMƏTİ TERRORÇULAR HAQQINDA İNFORMASİYAYA GÖRƏ 57 MİLYON DOLLAR ÖDƏMİŞDİR

27.10.2004 [16:26]
Çap et
A⁺ A^-

ABŞ hökuməti beynəlxalq terror aktlarının qarşısını almağa və axtarışda olan terrorçuları həbs etməyə imkan vermiş informasiyaya görə 35 şəxsə, ümumən, 57 milyon dollar ödəmişdir. AZƏRTAC xəbər verir ki, bunu ABŞ Departamentinin mətbuat xidməti bildirmişdir.

ABŞ hökuməti həmin məbləği “Ədalətə görə mükafatlandırma” proqramı çərçivəsində vermişdir. Proqram terrorçularla mübarizə aparmaq üçün dünyanın hər yerində ABŞ-a mühüm məlumat verən şəxsləri maddi cəhətdən maraqlandırmaq məqsədi daşıyır.

Bu məqsədlə oktyabrın 25-də üç Filippin vətəndaşına 1 milyon dollar verilmişdir. Belə ki, Filippin Silahlı Qüvvələri onların məlumatı sayəsində “Əbu Səyaf” terrorçu qruplaşmasının liderlərindən biri Hamsirac Salini aşkara çıxarıb məhv edə bilmişlər.

1984-cü ildən bəri fəaliyyət göstərən “Ədalətə görə mükafatlandırma” proqramı 25 milyon dollaradək mükafatlar nəzərdə tutur.

Hazırda 25 milyonluq ən iri mükafat Üsamə ben Laden və Əbu Musa əz-Zərqavi haqqında məlumata görə vəd edilmişdir.