SİYASƏT
ABŞ-IN VİTSE-PREZİDENTİNİN TÜRKİYƏYƏ SƏFƏRİ
Amerika Birləşmiş Ştatlarının vitse-prezidenti Dik Çeyni ikigünlük işgüzar səfərlə Ankaraya gəlmişdir.
O, Çankaya iqamətgahında Türkiyə Prezidenti Əhməd Necdət Sezər ilə görüşmüşdür. Görüşdə iki ölkə arasındakı siyasi, iqtisadi və hərbi sahədə əməkdaşlıq, beynəlxalq terrorizmə qarşı mübarizə, Əfqanıstandakı vəziyyət müzakirə edilmiş, bir sıra beynəlxalq və regional məsələlər haqqında fikir mübadiləsi aparılmışdır.
Dik Çeyni Türkiyənin baş naziri Bülənd Ecevit ilə də görüşmüşdür. ABŞ və Türkiyə nümayəndə heyətlərinin iştirakı ilə keçirilən görüş zamanı hər iki tərəfi maraqlandıran məsələlər müzakirə olunmuşdur.
Vitse-prezident Dik Çeyninin Türkiyə Silahlı Qüvvələri Baş Qərargahının rəisi, ordu generalı Hüseyn Qıvrıqoğlu ilə görüşü də nəzərdə tutulur.
AZƏRTAC-ın xüsusi müxbiri
Tural Rzayev
Ankara