ABŞ Konqresi əməkdaşlarına vatsapdan istifadəni qadağan edib
Bakı, 24 iyun, AZƏRTAC
ABŞ Konqresinin Nümayəndələr Palatası əməkdaşlarına şəxsi həyatın toxunulmazlığı ilə bağlı narahatlıqlara görə “Meta” şirkətinə məxsus vatsap mesencerindən istifadə etməməyi tapşırıb.
AZƏRTAC xəbər verir ki, “Financial Times” nəşri bu barədə qanunverici orqanın daxili sənədinə istinadla məlumat yayıb.
Məlumata görə, iyunun 30-dan etibarən Nümayəndələr Palatasının notbuklarına və mobil cihazlarına vatsap yükləmək qadağan edilib və artıq mövcud olan bu proqramı silmək tələb olunub.
Qərar istifadəçi məlumatlarının qorunmasında “qeyri-şəffaflıq”, saxlanılan məlumatların şifrələnməməsi və vatsap tətbiqindən istifadə ilə bağlı potensial təhlükəsizlik riskləri səbəbindən qəbul edilib.
“Meta” şirkəti isə öz növbəsində vatsap mesajlarının tam olaraq şifrələndiyini və bu səbəbdən onların nə şirkət, nə də üçüncü şəxslər tərəfindən oxunmasının mümkün olmadığını bildirib. Şirkət nümayəndələrinin sözlərinə görə, vatsap mesenceri Nümayəndələr Palatası tərəfindən təsdiqlənən siyahıdakı tətbiqlərin əksəriyyətindən daha təhlükəsizdir.
Qeyd edək ki, ABŞ Konqresinin Nümayəndələr Palatasının istifadəsinə icazə verdiyi tətbiqlərin siyahısına “Microsoft Teams”, “Signal”, “iMessage”, “FaceTime” və “Wickr” daxildir.
Bu arada vatsap mesenceri ABŞ Senatında rəsmi istifadə üçün təsdiqlənib.
Bölmənin digər xəbərləri
