ABŞ SİLAH İXRACINDA RUSİYANI ÖTMÜŞDÜR
Cari ilin yeddi ayında ABŞ-ın silah şirkətləri Konqresin təsdiqinə 21,6 milyard dollarlıq müqavilələr təqdim etmişlər ki, bu da Amerikanın dünya liderliyini Avropa ölkələrinə uduzduğu bütün 2005-ci ildəkinə nisbətən 76 faiz çoxdur.
Ekspertlər gözləyirlər ki, bu il silah satışı 1993-cü ilin rekord səviyyəsinə qalxacaqdır. Fars körfəzində müharibədən və SSRİ beynəlxalq silah bazarından getdikdən sonra 1993-cü ildə Amerikanın hərbi texnikası çox məşhurlaşmışdı.
Səudiyyə Ərəbistanı M1 Abrams tanklarını və milli qvardiyanın silahını modernləşdirmək üçün ABŞ ilə 8,7 milyard dollarlıq müqavilələr bağlamış, Pakistan isə 36 ədəd F-16 qırıcı təyyarəsi almış və daha 60 təyyarənin modernləşdirilməsi üçün müqavilə imzalamışdır ki, bu da ona 4,5 milyard dollara başa gələcəkdir.
Liderlər qrupunda ABŞ-dan sonrakı yerlərdə Rusiya, Fransa və Böyük Britaniya gəlir. ABŞ Pakistanla və Səudiyyə Ərəbistanı ilə müqavilələr bağlamazdan əvvəl Rusiya onu qabaqlayırdı. Keçən il Rusiya xaricə 9,5 milyard dollarlıq silah satmış və cari il üçün də bir o qədər məbləğdə müqavilələr bağlamışdır.
Bölmənin digər xəbərləri
