ABU QADIN HƏNDBOL KOMANDASI KUBOKLAR KUBOKUNUN NÖVBƏTİ MƏRHƏLƏSİNƏ ÇIXMIŞDIR
ABU qadın həndbol komandası Kuboklar kubokunun ikinci ilkin mərhələsində iki oyunun yekunlarına görə, yarışların növbəti mərhələsinə çıxmışdır. Gənclər, İdman və Turizm Nazirliyinin mətbuat xidmətindən AZƏRTAC-ın müxbirinə bildirmişlər ki, turnirin reqlamentinə əsasən, rəqiblərin hər birinin meydanında bir görüş keçirilməli idi. Püşkatmanın nəticələrinə görə, qızlarımızın rəqibi Hollandiyanın OMNİ komandası olmuşdur. Komandalar hər iki görüşü Haaqada keçirməyə razılaşmışlar. Birinci oyunu meydan sahibləri cüzi üstünlüklə - 24:23 hesabı ilə udmuşlar. İkinci görüş isə ABU-nun tam üstünlüyü ilə keçmişdir. Qızlarımız 30:25 hesabı ilə qalib gəlmişlər.
İki oyunun nəticələrinə görə, ümumi hesab 53:49 Azərbaycan həndbolçularının xeyrinədir.
Bölmənin digər xəbərləri
