ADU-da Çinin ənənəvi “Payızın ortası” bayramı qeyd olunub
Bakı, 6 oktyabr, AZƏRTAC
Azərbaycan Dillər Universitetinin (ADU) Konfutsi İnstitutunda Çinin ənənəvi “Payızın ortası” (“Çjongqiujie”) bayramına həsr olunmuş tədbir keçirilib.
ADU-dan AZƏRTAC-a bildirilib ki, “Aya ibadət və məhsul üçün şükür günü” kimi tanınan bu bayram çinlilər üçün ailə birliyinin, harmoniyanın, xoşbəxtliyin və yaxınlara sevginin rəmzidir.
Tədbirdə Konfutsi İnstitutunun müəllimi Kəmalə Məmmədova festivalın tarixindən, ailə üzvlərinin parlaq tam aya tamaşa etməsi, ay şirniyyatı yeməsi, uzaqlarda yaşayan yaxınlarına xoş arzular ünvanlaması kimi adət-ənənələrdən danışıb.
Konfutsi İnstitutunun direktoru Rafiq Abbasov çıxışında Çində qeyd olunan rəngarəng Ay festivalları, ailə birliyini simvolizə edən quş, balıq və meyvə formalı fənərlər, odlu əjdahalar və şirlərin rəqsi, eləcə də uşaqlara hədiyyə edilən ay dovşan fiqurları barədə məlumat verib.
Tədbir çərçivəsində ADU-nun tələbələri qədim Çin şairlərinin Aya həsr etdikləri şeirləri səsləndiriblər. Həmçinin qırmızı kağızdan ay dovşanlarının hazırlanması üzrə ustad dərsi təşkil olunub, qonaqlar fənərlərə yazılmış tapmacaları həll ediblər.
Sonra “Çan-e Aya yüksəlir” adlı teatr tamaşasından səhnələr nümayiş etdirilib. Tamaşa zamanı iştirakçılar əfsanənin qəhrəmanları - gözəl Çan-e, igid atıcı Hou Yi, nefrit dovşan, xain Pan Men və nəhəng Ali Ağa ilə tanış olublar.
Tədbirin sonunda qonaqlara evdə firavanlıq və xoşbəxtliyi simvolizə edən ənənəvi ay şirniyyatı təqdim olunub.
Bölmənin digər xəbərləri
