ADY media müsabiqəsinin qaliblərini mükafatlandırıb VİDEO
Bakı, 19 iyul, AZƏRTAC
İyulun 19-da “Azərbaycan Dəmir Yolları” (ADY) QSC və Azərbaycan Mətbuat Şurasının Ulu Öndər Heydər Əliyevin 100 illik yubileyinə həsr edilən media müsabiqəsinin nəticələri açıqlanıb.
AZƏRTAC xəbər verir ki, tədbirdə ADY və Mətbuat Şurasının rəhbərliyi, Rəqəmsal İnkişaf və Nəqliyyat Nazirliyinin məsul əməkdaşları, 30-dək kütləvi informasiya vasitələrinin rəhbərləri, media üzrə QHT təmsilçiləri iştirak ediblər.
ADY sədri Rövşən Rüstəmov media nümayəndələrini 22 İyul - Milli Mətbuat Günü münasibətilə təbrik edib və “QSC-nin media ilə əməkdaşlığa xüsusi əhəmiyyət verdiyini vurğulayıb.
Azərbaycan dəmir yollarının inkişafında Ulu Öndərin əvəzsiz xidmətlərindən danışan Rövşən Rüstəmov bildirib ki, müsabiqənin keçirilməsində məqsəd Heydər Əliyevin zəngin irsinin öyrənilməsi ilə yanaşı, onun dəmir yollarının inkişafındakı xüsusi xidmətlərini təşviq etmək idi: “1969-1982-ci illəri Azərbaycan dəmir yollarının texniki tərəqqi və hərtərəfli inkişaf dövrü kimi qiymətləndirilir. Heydər Əliyevin hakimiyyətə gəlməsi ilə dəmir yollarının maddi-texniki bazasının formalaşdırılması, infrastrukturun müasirləşdirilməsi və bölgələrə yeni dəmir yolu xətlərinin çəkilməsində əsaslı inkişaf baş verdi. Həmin dövrdə onlarla yeni vağzal binaları, Qafqazda müvafiq sahə üzrə yeganə ixtisaslaşmış müəssisə olan Konteynerlərin təmiri üzrə Keşlə vaqon deposu və daha bir neçə strateji infrastruktur tikililəri istifadəyə verildi”.
Nəqliyyat sahəsində milli kadr potensialının formalaşdırılması istiqamətində Ulu Öndərin uzaqgörən siyasətindən danışan ADY sədri qeyd edib ki, 1970-1987-ci illərdə 200 nəfərə yaxın gənc Sovet İttifaqının tanınmış ali məktəblərində dəmiryolçu ixtisası üzrə təhsil alaraq Azərbaycana qayıdıb. Hazırda həmin mütəxəssislərin böyük əksəriyyəti ADY-nin müxtəlif strukturlarında çalışır.
Daha sonra tədbirdə çıxış edən Azərbaycan Mətbuat Şurasının sədri Rəşad Məcid bildirib ki, müsabiqəyə daxil olan 70-dən çox yaradıcı işdə jurnalistlərin analitik yazı, videoreportaj və məqalələri yer alıb: “Ölkəmiz üçün strateji əhəmiyyət daşıyan dəmir yollarının inkişafı haqqında müsabiqə mövzuları jurnalistlərimiz tərəfindən geniş işlənilib, maraqlı faktlar ortaya çıxarılıb. Peşəkar media ekspertlərindən ibarət münsiflər heyəti materialları ədalətli və şəffaf qaydada qiymətləndirib”.
Qeyd edək ki, Ulu Öndərin dəmir yollarının inkişafındakı xüsusi roluna həsr olunmuş müsabiqə “Azərbaycan dəmir yollarının inkişafının Heydər Əliyev modeli”, “Heydər Əliyevin gerçəkləşən arzusu: Qədim İpək Yolundan TRACECA-yadək, Şərqlə Qərbin, Şimalla Cənubun qovşağında” və “Sibirin və Uzaq Şərqin böyük kəşfi - Baykal Amur magistralının tikintisini sürətləndirən Heydər Əliyev nəhəngliyi” mövzularına həsr olunub.
Müsabiqəyə bu ilin 1 iyun - 15 iyul müddətində 53 kütləvi informasiya vasitəsindən 77 iş təqdim olunub. Müsabiqənin şərtlərinə əsasən, 9 nəfər jurnalist əsas, 30 nəfər isə həvəsləndirici mükafata layiq görülüb. Fərqlənən jurnalistlər arasında AZƏRTAC-ın əməkdaşı Xəyalə Cəfərova da var.
Tədbirin sonunda müsabiqənin qaliblərinə sertifikat və mükafatlar təqdim edilib.
Bölmənin digər xəbərləri
