AFFA Azərbaycan Kubokunun final oyunundakı hadisələrlə bağlı cəzaları açıqlayıb
Bakı, 3 iyun, AZƏRTAC
AFFA İntizam Komitəsinin qərarları açıqlanıb.
AZƏRTAC xəbər verir ki, Azərbaycan Kubokunun final oyununda qeydə alınan qayda pozuntularına hüquqi qiymət verilib.
“Sabah”la matçda 4 futbolçusu sarı vərəqə aldığı üçün “Qarabağ” 700 manat cərimələnib. Klubun məşqçisi Müşfiq Hüseynov meydana daxil olaraq hakimin qərarına etiraz etdiyinə görə birbaşa qırmızı vərəqə aldığı üçün 2 oyun cəzalanıb, onun bu hərəkəti komandasını 1500 manat xərcə salıb.
“Qarabağ”ın futbolçusu Yassin Benzia hakimi təhqir etdiyinə görə birbaşa qırmızı vərəqə aldıqdan sonra onlara fiziki təzyiq göstərməyə cəhd etdiyinə görə 5 oyun cəzalanıb, klubu 3000 manat cərimə olunub.
Azarkeşləri pirotexniki vasitədən istifadə etdiyinə görə ağdamlılar əlavə 1500 manat cərimə ödəyəcəklər.
Bundan başqa, 5 futbolçusu sarı vərəqə aldığı üçün “Sabah” 700 manat ziyana düşüb. Həmçinin azarkeşləri pirotexniki vasitədən istifadə etdiyinə görə Bakı təmsilçisi daha 1500 manat cərimələnib.
Bölmənin digər xəbərləri
