Ağcabədidə ehtiyacı olan yüzlərlə ailəyə ərzaq yardımı paylanıb
Ağcabədi, 12 aprel, AZƏRTAC
Prezident İlham Əliyevin “Biz birlikdə güclüyük!” şüarına dəstək olaraq Ağcabədi Rayon İcra Hakimiyyətinin təşəbbüsü və təşkilatçılığı ilə rayonda ehtiyacı olan yüzlərlə ailəyə ərzaq yardımı paylanıb.
AZƏRTAC-ın bölgə müxbiri xəbər verir ki, rayon icra hakimiyyəti başçısı aparatının əməkdaşları, inzibati ərazi dairəsi üzrə nümayəndələr, bələdiyyə üzvləri, ayrı-ayrı sahibkarlar, rayonun hüquq-mühafizə orqanları, digər vəzifəli şəxslər və xeyirxah vətəndaşların qoşulduğu “Biz birlikdə güclüyük” adlı kampaniya çərçivəsində rayonun şəhər, qəsəbə və kəndlərində ehtiyacı olan 700-dən çox ailənin evinə yardım payları çatdırılıb. Rayon icra hakimiyyəti tərəfindən 1000 ailəyə, hər birinə 10 kiloqramlıq un payları göndərilib.
Mart ayının son günlərindən etibarən Ağcabədidə başlanılmış digər bir xeyirxah təşəbbüslə 130-dan çox ərzaq mağazasında “Karantin dövründə pulsuz çörək” aksiyası da davam etdirilir. Həmin mağazalardan alış-veriş edən xeyirxah şəxslər müəyyən məbləğdə ianə etməklə imkansız, ehtiyacı olan sakinlərin pulsuz çörək əldə etməsinə yardımçı olurlar. Aksiyanın məqsədi aztəminatlı ailələri, kimsəsiz və tənha sakinləri pulsuz çörəklə təmin etməkdir.
Xüsusi karantin rejiminin tələblərinə əsasən evdən çıxmayan 200-dən çox tənha şəxslərə sosial işçilər tərəfindən xidmət göstərilir və bununla yanaşı, həmin sakinlərə gün ərzində pulsuz çörək çatdırılır.
Nazirlər Kabineti yanında Operativ Qərargahın qəbul etdiyi xüsusi karantin rejiminin tələb və tövsiyələrinə rayonda ciddi əməl olunur. Koronavirus infeksiyasının yayılmasının qarşısının alınması və sosial təcridin gücləndirilməsi, rayonda xüsusi karantin rejiminin tələblərinin yerinə yetirilməsinə nəzarət, habelə fərdi izahetmə-xəbərdarlıq işinin aparılması üçün rayon icra hakimiyyəti başçısı aparatı, inzibati ərazi nümayəndəlikləri, bələdiyyələr və könüllü fəallardan ibarət 82 mobil qrup yaradılıb. Həmin qruplar tərəfindən bu günədək 20 mindən çox ailə ziyarət olunub. Mobil qruplar vasitəsilə imkansız ailələr öyrənilərək onlara yardım edilir. Həmçinin, vətəndaşlarla görüşdə ölkədə tətbiq olunan xüsusi karantin rejiminə ciddi əməl olunması, zərurət olmadan digər şəxslərlə təmasda olmamaları və virusun yayılmasının qarşısının alınmasına dəstək olacaq şəxsi gigiyena qaydalarına əməl etməyin vacibliyi vurğulanır. Vətəndaşlara özlərinin və ailə üzvlərinin sağlamlığı naminə onlarla aparılmış təbliğat işlərinə tam məsuliyyətlə əməl etmələri tövsiyə olunur.
Buna baxmayaraq, rayonda xüsusi karantin rejiminin tələblərini pozan şəxslər də olur ki, onlar barəsində tədbirlər də davam etdirilir. Xəbərdarlıq olunmaqla yanaşı, onlardan bəziləri cərimə edilir, həmçinin inzibati məsuliyyətə cəlb olunurlar.
Rayonda genişmiqyaslı dezinfeksiya işləri də həyata keçirilir. Dezinfeksiyaedici məhlullarla rayonun şəhər, qəsəbə və bütün kənd ərazilərində yollar, çoxmənzilli binalar, qeyri-yaşayış obyektləri, həyətlər, fərdi yaşayış evləri mütəmadi şəkildə dezinfeksiya olunur. Bu işlərin həyata keçirilməsi üçün rayona 100-dən çox çiləyici əl aparatları gətirilib, kəndlərdə yolların dizenfeksiyası üçün kənd təsərrüfatı texnikaları çiləyici kimi bu işlərə cəlb olunub.
Koronavirus infeksiyasının yayılmasının qarşısının alınması məqsədilə ölkədə xüsusi karantin rejimi elan olunsa da, rayonda əhalinin əhval-ruhiyyəsi yüksəkdir və mövsümlə əlaqədar insanlar kənd təsərrüfatı işləri ilə də məşğul olur. Rayonda taxıl sahələrinə gübrə verilib, pambıq əkininə hazırlıq işləri yekunlaşaraq, artıq çiyid səpininə başlanılıb. İlk səpin rayonun Pərioğlular kəndində həyata keçirilib. Hava şəraiti ilə əlaqədar səpində fasilə yaransa da, yaxın günlərdə kütləvi səpin işlərinə başlanılacaqdır.
Bölmənin digər xəbərləri
