Ağsuda sel və daşqınlara qarşı mühafizə tədbirləri görülür
Ağsu, 1 sentyabr (AZƏRTAC). Dağlara yağan güclü leysan yağışları və bunun nəticəsində yaranan sel suları, adətən, Ağsu rayonunun ərazisindən keçən Ağsuçayda və Girdiman çayında, eləcə də Kükəş dərəsindən daşqınlara səbəb olur. Bu, xüsusilə dağətəyi ərazilərdə yerləşən yaşayış məntəqələrində ciddi fəsadlar törədir, əkin sahələrinə böyük zərər vurur. Təsadüfi deyildir ki, son illər tez-tez baş verən bu cür fəsadlara qarşı dövlət səviyyəsində ciddi tədbirlər həyata keçirilir.
Azərbaycan Meliorasiya və Su Təsərrüfatı ASC-nin Ağsu Suvarma Sistemləri İdarəsindən AZƏRTAC-a bildirmişlər ki, təkcə cari ilin ötən dövründə Ağsu şəhərini və ona bitişik əraziləri sel sularından qorumaq məqsədilə Ağsuçayın sahilində 2100 kubmetrlik, çayın Maşadqanlı kəndindən keçən hissəsində isə 2000 kubmetrlik daş-beton bənd tikilmişdir. Hazırda bir istiqamətdə işlər davam etdirilir. İlin sonunadək daha 4000 kubmetrlik bənd inşa olunacaqdır. Bundan başqa, Ağsuçayın və Girdiman çayının sahillərində əvvəllər çəkilmiş daş-beton bəndlərin 1000 kubmetrə yaxın hissəsində təmir işləri aparılmışdır.
Hər il xüsusilə Qaraməmmədli və Daşdəmirbəyli kəndləri üçün daha çox təhlükə yaradan Kükəş dərəsinin indiyədək 30 min kubmetr dolmuş hissələri təmizlənmişdir. Ağalarbəyli kəndi ərazisində Yuxarı Şirvan kanalının Ağsu qolunun altındakı keçidi yenidən qurulmuşdur. Digər kanallar, o cümlədən Əlabbas, Ömərlahıc, Mühəndis kanalları lildən təmizlənmişdir.
Hazırda bütün təhlükəli ərazilərdə sel sularından mühafizə tədbirləri davam etdirilir. Bu işlərə kifayət qədər texnika cəlb edilmişdir.
Bölmənin digər xəbərləri
