Aktotı Raimkulova: Ədəbiyyat xalqların mənəvi birliyinin mühüm alətidir
Bakı, 7 oktyabr, AZƏRTAC
Artıq ikinci ildir ki, Bakı Beynəlxalq Kitab Sərgisində fəal iştirak edirik. Bu, təkcə Azərbaycan deyil, bütün beynəlxalq ictimaiyyət üçün əlamətdar platformadır. Buradakı geniş sərgi mərkəzində hər bir ölkə ən yaxşı nəşriyyat layihələrini və ədəbi yenilikləri təqdim etməkdən böyük şərəf duyur.
Bu sözləri XI Bakı Beynəlxalq Kitab Sərgisi çərçivəsində AZƏRTAC-ın müxbirinə müsahibəsində Türk Mədəniyyəti və İrsi Fondunun prezidenti Aktotı Raimkulova deyib.
Fondun prezidentinin sözlərinə görə, Bakı Beynəlxalq Kitab Sərgisi ilham, ünsiyyət, kitaba həqiqi maraq mühiti ilə seçilir. O vurğulayıb: “Azərbaycanın möhtərəm Prezidenti İlham Əliyevin təşəbbüsü ilə yaradılmış bu beynəlxalq təşkilatda öz pavilyonumuzu təqdim etmək imkanına nail olmağımız qürurvericidir. Bu təşəbbüs bütün türk dövlətlərinin başçıları tərəfindən dəstəklənib”.
A.Raimkulova qeyd edib ki, təşkilata Azərbaycan, Qazaxıstan, Qırğızıstan, Özbəkistan və Türkiyə daxildir. Macarıstan isə müşahidəçi statusuna malikdir.
O əlavə edib: “Bir neçə il ərzində çap olunan nəşrlərimizi təqdim etməkdən qürur duyuruq. Onların arasında “Türk dünyasının ədəbi inciləri”, “Türk dünyasının elmi inciləri”, “Türk dünyasının tarixi inciləri” və “Türk dünyasının görkəmli şəxsiyyətləri” populyar kitabları var.
Fondun prezidentinin sözlərinə görə, bu silsilələr Azərbaycan, qazax, qırğız, türk, özbək, türkmən və digər dillərə tərcümə edilmiş türk xalqlarının ədəbiyyatının, elminin, tarixinin ən yaxşı nümunələrini ehtiva edir. Bəzi nəşrlər türk mədəniyyətini dünya oxucularına daha yaxından tanıtdırmaq üçün ingilis də daxil olmaqla yeddi dildə nəşr olunur.
A.Raimkulova vurğulayıb ki, Bakı Kitab Sərgisində iştirak Fond üçün beynəlxalq arenaya açılan pəncərə rolunu oynayır. O əlavə edib: “Bu sərgi sayəsində biz tanınır və digər böyük beynəlxalq tədbirlərə dəvət olunuruq. Məsələn, keçən il Ankarada keçirilən genişmiqyaslı kitab sərgisində iştirak etdik. Bu kimi layihələr təkcə türk mədəniyyətini təbliğ etmir, həm də xalqlar arasında qarşılıqlı anlaşmaya təkan verir”.
Aktotı Raimkulova qeyd edib ki, ədəbiyyat xalqların mənəvi birliyi üçün güclü alət olaraq qalır. O bildirib: “Kitablar insanların bir-birini başa düşməsinə, mədəni və intellektual nüansların üzə çıxmasına, hörmət və dostluğun inkişafına kömək edir. Biz tarixi, maarifləndirici və uşaq kitablarına böyük əhəmiyyət veririk və onların hər kəs üçün əlçatan olmasına çalışırıq. Fond hazırda “Türk irsi” rəqəmsal platformasının yaradılması üzərində işləyir. Bu platformada bütün nəşrlərimiz və türk ədəbiyyatının ən yaxşı əsərləri elektron formatda oxunacaq. Eyni zamanda, oxucular türk sivilizasiyasının çox zəngin irsi ilə tanış ola biləcəklər”.
Fondun prezidenti müsahibənin sonunda Bakı Beynəlxalq Kitab Sərginə yeni-yeni uğurlar və xalqlarımıza firavanlıq arzulayıb.
Bölmənin digər xəbərləri
