Ali təhsil haqqında dövlət sənədlərinin verilməsi qaydası təsdiqlənib
Bakı, 8 yanvar, AZƏRTAC
Ali təhsil pilləsinin bakalavriat, əsas (baza ali) tibb təhsili, magistratura və rezidentura səviyyələrində təhsil haqqında dövlət sənədlərinin təsvirləri və onların verilməsi qaydası təsdiqlənib.
AZƏRTAC xəbər verir ki, bununla bağlı Azərbaycan Respublikası Nazirlər Kabineti müvafiq qərar qəbul edib. Qərara əsasən, ali təhsilin müvafiq səviyyələrini bitirən şəxslərə diplom və diploma əlavə “Təhsil Mərkəzləşdirilmiş İnformasiya Sistemi” (TMİS) üzərindən “Elektron imza və elektron sənəd haqqında” Qanunun tələblərinə uyğun olaraq elektron sənəd formasında təqdim ediləcək. Diplomlarda göstərilən məlumatlar Elektron Hökumət İnformasiya Sistemi vasitəsilə əldə oluna biləcək və bu məlumatların təqdim edilməsi diplomun təqdim edilməsi ilə bərabər tutulacaq.
Qaydaya görə, məzunların diplomları 10 iş günü müddətində hazırlanacaq. Bakalavriat, əsas (baza ali) tibb təhsili və magistratura səviyyələri üzrə diplomlar ali təhsil müəssisəsinin rəhbərinin, rezidentura səviyyəsi üzrə diplomlar isə Azərbaycan Respublikasının səhiyyə nazirinin gücləndirilmiş elektron imzası ilə təsdiqlənəcək. Elektron qaydada yaradılan diplom və diploma əlavə məzunların elektron kabinetində yerləşdiriləcək.
Sənəddə diplom və diploma əlavədə əks etdiriləcək məlumatların siyahısı, o cümlədən ixtisas, ali təhsil səviyyəsi, akademik kreditlər, ümumi orta müvəffəqiyyət göstəricisi, kvalifikasiya səviyyəsi və sənədlərin həqiqiliyinin yoxlanılması üçün ştrix-kod tələbləri müəyyən edilib. Məzunların müraciəti əsasında təhsil haqqında dövlət sənədlərinin ingilis dilində tərtib edilməsi də nəzərdə tutulur.
Qayda diplomun verilməsindən imtina halları, diplomun dublikatının verilməsi, səhv məlumatların aradan qaldırılması, diplomların ləğv edilməsi və yenidən tərtib olunması prosedurlarını da əhatə edir. Diplom itirildikdə, korlandıqda və ya məhv olduqda dublikat yalnız elektron sənəd formasında veriləcək, diplomun və ya diploma əlavənin əvəzinə arayışın təqdim edilməsi isə qadağan olunur.
Qərarın icrası ali təhsil sahəsində rəqəmsal idarəetmənin gücləndirilməsinə, sənəd dövriyyəsinin sadələşdirilməsinə və məzunların təhsil sənədlərinə operativ çıxış imkanlarının genişləndirilməsinə yönəlib.
Bölmənin digər xəbərləri
