AZƏRTAC xarici KİV-lərə istinadla xəbər verir ki, Kaliforniya Universitetinin alimləri belə qənaətə gəlmişlər ki, planetimizdə bütün həyatın əsasını gil təşkil edir. Məlumdur ki, heyvanat aləminin coşğun inkişafına atmosferdə oksigenin faizinin artması səbəb olmuşdur. Beləliklə, heyvanat aləminin meydana gəlməsinə təkan verən başlıca amillər arasında üstünlük həyatverici qazı yaradan prosesə məxsusdur. Son tədqiqatlar göstərmişdir ki, planetimizdə həyatın coşğun inkişafının əvvəli zaman etibarilə Yerin təkində xeyli gil ehtiyatının formalaşması ilə bir vaxta düşür. Bundan əlavə, gil çöküntülərini müşayiət edən geoloji-kimyəvi proseslər zamanı xeyli miqdarda oksigen ayrıldığı artıq sübuta yetirilmiş faktdır.
Universitetin professoru Martin Kenneday demişdir: “Tədqiqatlarımız ilk dəfə göstərmişdir ki, Yer kürəsinin səthini örtən ilkin torpaqlar atmosferi oksigenləşdirmək və çoxhüceyrəli həyatı saxlamaq üçün zəruri olan faydalı qazıntı kimi gil istehsalını artırmış və ağır geoloji-kimyəvi prosesləri təmin etmişdir. Əminliklə demək olar ki, əgər gil formalaşmasaydı, biz, sadəcə, mövcud olmazdıq”.
