Almaniya Azərbaycanın sülhün və sabitliyin təmin olunmasındakı fəaliyyətini dəstəkləyir ŞƏRH
Bakı, 23 iyul, AZƏRTAC
Almaniya ilə Azərbaycan arasında siyasi və iqtisadi əlaqələr hər zaman qarşılıqlı hörmət əsasında qurulub. Berlində Prezident İlham Əliyevlə Almaniya Kansleri arasında təkbətək və geniş tərkibdə görüşlər, eləcə də imzalanan sənədlər əməkdaşlığın gələcək inkişaf perspektivlərindən xəbər verir.
Bu sözləri AZƏRTAC-a açıqlamasında Bakı Dövlət Universitetinin kafedra müdiri, professor Kamilə Əliyeva söyləyib.
O qeyd edib ki, Prezident İlham Əliyev və Federal Kansler Fridrix Mersin imzaladıqları ikitərəfli tərəfdaşlıq üçün strateji gündəliyə dair Birgə Bəyannamədə dövlətlərin bir-birinin ərazi bütövlüyünə və suverenliyinə hörmətlə yanaşması xüsusi vurğulanıb. Bu gün Almaniyanın Azərbaycanın Cənubi Qafqazda sülhün və sabitliyin təmin olunması istiqamətində həyata keçirdiyi fəaliyyəti dəstəklədiyini xüsusi qeyd etmək lazımdır. Avropa İttifaqının aparıcı dövləti və iqtisadi güc mərkəzi olan Almaniyanın Azərbaycanla sıx siyasi və iqtisadi əlaqələrin qurulmasına böyük maraq göstərməsi ölkəmizin beynəlxalq nüfuzunun göstəricisidir", - deyə K.Əliyeva vurğulayıb.
Professor əlavə edib ki, Azərbaycan Almaniyanın enerji təhlükəsizliyinin təmin olunmasında da mühüm rol oynayır. Azərbaycanın hər il xarici dövlətlərə ixrac etdiyi 25 milyard kubmetr təbii qazın yarısı Avropa İttifaqına üzv olan 10 ölkəyə nəql olunur ki, bunun da 1,5 milyard kubmetri Almaniyaya çatdırılır. Prezident İlham Əliyev çıxışında Almaniyaya qaz ixracının artırılması üçün böyük imkanların olduğunu vurğuladı. Almaniya Kansleri isə çıxışında Azərbaycanın Avrasiya məkanında olduqca önəmli dövlət olduğunu xüsusi qeyd etdi.
İki dövlət arasında əldə olunan razılaşmaya uyğun olaraq alman şirkətləri Azərbaycanın nəqliyyat və logistika infrastrukturunun genişləndirilməsində də yaxından iştirak edəcəklər.
Dövlətimizin başçısının Almaniyaya səfəri enerji təhlükəsizliyi, logistika, qarşılıqlı investisiyalar və regional təhlükəsizlik sahələrində yeni imkanların yaranmasına səbəb olacaq. Sözsüz ki, bu səfər Orta Dəhlizin strateji əhəmiyyətinin daha da artmasına da töhfə verəcək. Bu gün Almaniya Azərbaycanın Avropada əsas siyasi və iqtisadi tərəfdaşlarından biridir.
“Prezident İlham Əliyevin Almaniyaya budəfəki səfəri Azərbaycan–Almaniya münasibətlərinin daha da dərinləşməsinə, iqtisadi əlaqələrin genişlənməsinə və siyasi dialoqun yeni inkişaf mərhələsinə qədəm qoymasına mühüm töhfə verməklə yanaşı, ölkəmizin uğurlu xarici siyasətinin növbəti mühüm nailiyyəti kimi tarixə yazılacaq”, - deyə professor əlavə edib.
Bölmənin digər xəbərləri
