ALMANİYA MADONNANI KAFİRLİYƏ GÖRƏ TƏQİB ETMƏYƏCƏK
Nəzərdə tutulan ittiham müğənninin çıxışındakı çarmıxaçəkilmə səhnəsi ilə bağlı idi. Madonna “Yaşa ki, danışasan” mahnısının ifası zamanı başında tikanlı çələnglə güzgülü xaç üzərinə qalxır. İtaliyada katoliklər Madonnanın şousundan bu epizodu “kilsəyə qarşı düşməncəsinə çıxış” sanmışdılar.
Almaniyanın hakimiyyət orqanları “müğənninin çıxışına ehtiyatla yanaşacaqlarına” söz vermişdilər. Lakin ölkədə planlaşdırılmış iki konsertin avqustun 20-də Düsseldorfda keçirilən və 45 min tamaşaçı toplayan birincisindən sonra prokurorluğun nümayəndəsi bildirmişdir ki, “bəlkə də, çarmıxaçəkilmə səhnəsi dindarlar üçün xoşagəlməzdir, amma Madonna heç bir qanunu pozmur”.
Xatırladaq ki, Madonnanın dünya turu çərçivəsində konsertlərindən biri sentyabrın 11-də Moskvada olacaqdır. Lakin müğənninin meneceri bildirmişdir ki, o, naməlum şəxslərdən hədə-qorxu dolu məktub almışdır. Onlar Madonnanın Rusiyada konsert verməməsini tələb edirlər. Bu naməlum şəxslər yazmışlar ki, o, Moskvada konsert versə, uşaqlarını oğurlayacaqlar.
Britaniya jurnalistlərinin ehtimalına görə, bu xəbərdarlığı “rus mafiyası”, ya da pravoslav kilsəsi elan etmişdir. Lakin Madonna demişdir ki, anonim hədə-qorxulara görə Moskvada konsertini ləğv etmək fikrində deyildir.
Bölmənin digər xəbərləri
