ALTI YAŞLI ƏLƏSGƏRİN ADI GİNNESİN REKORDLAR KİTABINA DAXİL EDİLMİŞDİR
Bu günlərdə Moskvadan Lənkərana göndərilmiş faksda Ginnesin “Rekordlar kitabı” nəşriyyatının rusdilli səlahiyyətli nümayəndəliyinin “Planetin rekordlarının qeydiyyatı üzrə Rusiya komitəsi” regional ictimai təşkilatının və “İnterstronq” Beynəlxalq Rekordçular Klubu təşkilat komitəsinin Ələsgər Rəhim oğlu Həsənovun adına yazdıqları vəsiqənin surəti əks olunmuşdur.
Rayonun Aşağı Nüvədi qəsəbəsində yaşayan balaca Ələsgər vaxtilə azyaşlılar arasında yunan-Roma güləşi üzrə Azərbaycan çempionu olmuş idman ustası Rəhim Həsənovun ailəsində böyüyür. O, döşəməyə uzanaraq, qollarını dayaq verməklə bütün bədənini sinəsi yerə dəyənədək 1500-2000 dəfə qaldırıb, endirir. Atası Ələsgərin bu qeyri-adi fiziki qüvvəsini görüb onu Rusiya paytaxtına aparmışdır. “İnterstronq” BRK-da 6 yaşlı bu azərbaycanlı balasının qüvvəsini sınaqdan keçirən komisiyya heyrətə gəlmiş, onu azyaşlılar arasında planetin rekordçusu adlandırmış, adını Ginnesin “Rekordlar kitabı”na daxil etməklə ona müddətsiz etibarlı sayılan 2003-cü il mart tarixili 027 nömrəli vəsiqə vermişdir.
Bölmənin digər xəbərləri
