Amerikada çıxan “Forum” qəzetində Xocalı soyqırımı haqqında məqalə dərc edilmişdir
Bakı, 3 mart (AZƏRTAC). Amerikada çıxan “Forum” adlı aparıcı rusdilli qəzetdə Şimon Brimanın “İsrail-Azərbaycan: soyqırımı yaddaşı və unikal alyans” sərlövhəli məqaləsi dərc edilmişdir.
Xocalı soyqırımı ilə əlaqədar İsraildə keçirilmiş elmi-praktiki konfransdan bəhs edən məqalədə deyilir: “Azərbaycanın müasir tarixində sağalmaz yaraya çevrilmiş faciəni İsraildə yaxşı başa düşür və bu faciənin ağrı-acısına şərik olurlar”.
Müəllif yazır: “Həmin axşam mən yəqin etdim ki, israillilər başqa xalqların kədərinə şərik olmağı bacarır, Holokostun yəhudilərin qəlbində doğurduğu ağrı isə başqa xalqların eyni ağrı-acısı ilə uzlaşa bilər”. Ş.Briman yazır: “1992-ci il fevralın 26-da erməni silahlı dəstələri tərəfindən Azərbaycanın Xocalı şəhərinin dinc sakinlərinin kütləvi şəkildə qətlə yetirilməsinin 20-ci ildönümü yəhudi və müsəlmanları bir araya gətirən dəhşətli bir tarixdir”. “Quru” statistik rəqəmlər insanı dəhşətə gətirir: erməni qoşunlarının Xocalı əhalisinə qarşı törətdiyi vəhşiliklər nəticəsində 613 nəfər öldürülmüş, 487 adam əlil olmuş, 1275 dinc sakin - ahıl və qoca, uşaqlar və qadınlar əsir düşmüş, işgəncələrə məruz qalmış, 150 nəfər itkin düşmüşdür.
Lakin soyqırımının müstəqil şahidlərinin dedikləri daha təsirlidir. Xocalı faciəsi törədilən yerə gedən ilk adamlardan biri - rusiyalı telereportyor Yuri Romanov özünün “Mən müharibəni çəkirəm” adlı kitabında dinc sakinlərin həlak olduğu yerə gəldikləri anı belə xatırlayır: “Mən helikopterin girdə pəncərəsindən baxıram və oradan gördüyüm, ağlasığmaz dərəcədə dəhşətli mənzərə sözün həqiqi mənasında məni sarsıdır. Qar lopalarının, qışdan qalmış sırsıraların əridiyi dağ yamacının kölgə yerindəki saralmış otun üzərində insan cəsədləri sərilmişdir. Böyük bir ərazidə qadınların, qocaların, qarıların, südəmər körpədən tutmuş yeniyetməyə qədər müxtəlif yaşlı oğlan və qızların cəsədləri səpələnmişdir. Meyitlər arasında iki fiqur insanın qəlbini parçalayır. Bunlardan biri nənə, digəri balaca qızcığazdır. Ağ saçlı, başı açıq nənə əynində göy rəngli gödəkcə olan balaca qızcığazın yanında üzü üstə uzanmışdır. Nədənsə, onların ayaqlarını tikanlı məftillə bağlamışlar. Nənənin əlləri də bağlıdır. Hər ikisi başından güllə ilə vurulmuşdur. Təxminən 4 yaşı olan qızcığaz həyatının son anında əllərini artıq öldürülmüş nənəsinə tərəf uzatmışdır. Bu səhnədən o qədər sarsıldım ki, kamera da dərhal yadıma düşmədi...”.
Məqalədə Netaniya Akademik Kollecində keçirilmiş “İsrail-Azərbaycan: Strateji alyans” mövzusunda konfransın iştirakçılarının çıxışlarından parçalar verilir. Onlardan bir neçəsini sizə təqdim edirik: Yerusəlimdəki Yəhudi Universitetinin professoru Eldar Pardo Xocalı soyqırımına toxunaraq qeyd etmişdir ki, Xocalı qırğını işğalın qurbanı olmuş Azərbaycan xalqının dəhşətli faciəsidir. Professor Pardo vurğulamışdır: “Azərbaycan özünün işğal edilmiş ərazilərinin qaytarılmasını tələb etməkdə tamamilə haqlıdır”.
Konfransda çıxış edən Azərbaycan Mədəniyyət Mərkəzinin rəhbəri Yeganə Salman demişdir: “Hazırda Azərbaycanda öz doğma yurdlarına nə vaxt qayıda biləcəyini 20 ildən artıq gözləyən bir milyon qaçqının yaşaması haqqında dünya ictimaiyyəti hələ də bilmir. Azərbaycan diasporu bu fakta laqeyd qala bilməz”.
Bölmənin digər xəbərləri
