Ankara koronavirusa qarşı peyvəndi Pekindən alacaq
Bakı, 15 dekabr, AZƏRTAC
Türkiyə Çin kompaniyaları tərəfindən hazırlanan koronavirus əleyhinə peyvəndin effektiv və təhlükəsiz olduğunu, vaksinasiyada ondan istifadə ediləcəyini bildirib.
AZƏRTAC xarici KİV-lərə istinadla xəbər verir ki, bu məsələ Türkiyə və Çin xarici işlər nazirləri Mövlud Çavuşoğlu və Van İ arasında telefon danışığı zamanı müzakirə olunub. Mövlud Çavuşoğlu koronavirusun yayılmasının qarşısını uğurla aldığına görə Çin rəhbərliyini təbrik edib.
Xatırladaq ki, mart ayında Ümumdünya Səhiyyə Təşkilatı yeni koronavirusun yayılmasını pandemiya elan edib. Pandemiyanın statistikasını aparan Worldometer saytının məlumatına əsasən, indiyə qədər dünyada koronavirusa 73 milyon 270 mindən çox yoluxma və 1 milyon 630 mindən artıq ölüm faktı qeydə alınıb.
Türkiyədə ötən sutka ərzində 29 min 617 yoluxma halı aşkarlanıb və pandemiyanın başlanğıcından bəri yoluxanların ümumi sayı 1 milyon 866 min 345 nəfərə çatıb. Həmçinin COVID-19 infeksiyası səbəbindən 16 min 646 nəfər vəfat edib.
Bölmənin digər xəbərləri
