QAN YADDAŞI
Anma mərasimində ermənilərin zaman-zaman azərbaycanlılara qarşı həyata keçirdikləri məkrli planlardan danışılmışdır
Bakı, 30 mart (AZƏRTAC). Odlar Yurdu Universitetində (OYU) 31 mart - Azərbaycanlıların Soyqırımı Gününə həsr olunmuş anma mərasimi keçirilmişdir.
AZƏRTAC xəbər verir ki, tədbirdə universitetin birinci prorektoru, professor Samir Vəliyev ermənilərin zaman-zaman azərbaycanlılara qarşı həyata keçirdikləri məkrli planlardan danışmışdır. Bu soyqırımının Azərbaycan xalqı və dövlətçiliyinin tarixində milli yaddaşın təzahürü olduğunu qeyd etmişdir. Ümummilli lider Heydər Əliyevin 1998-ci il 26 mart tarixli Fərmanından sonra 31 mart - Azərbaycanlıların Soyqırımı Günü kimi dövlət səviyyəsində qeyd olunur. S.Vəliyev ermənilərin xalqımıza qarşı törətdikləri vəhşiliklərlə bağlı həqiqətlərin beynəlxalq ictimaiyyətin diqqətinə çatdırılması istiqamətində Prezident İlham Əliyevin rəhbərliyi ilə həyata keçirilən siyasətin əhəmiyyətini diqqətə çatdırmışdır. Azərbaycanlılara qarşı həyata keçirilən soyqırımı siyasəti bu gün dövlət səviyyəsində bütün dünyada tanıtdırılır.
Çıxış edən tələbələr azərbaycanlıların kütləvi surətdə qırğınını, doğma yurdlarından didərgin salınmasını XX əsr dünya tarixinin ən faciəli və dəhşətli səhifələri kimi dəyərləndirmişlər.