ARDNŞ-da təlim kursları 3D formatında proqramlaşdırılmış simulyatorlarla tədris olunacaqdır
Bakı, 1 iyun (AzərAc). Azərbaycan Respublikası Dövlət Neft Şirkətinin (ARDNŞ) Təlim, Tədris və Sertifikatlaşdırma İdarəsində (TTSİ) “EON Reality” şirkətinin idarəedici müdiri Dan Lejerskan ilə görüş keçirmişdir.
ARDNŞ-in mətbuat xidmətindən AZƏRTAC-a bildirmişlər ki, TTSİ-nin rəisi Fuad Süleymanov görüşdə ölkəmizdə gənclərin müasir biliklərə yiyələnməsi, yaradıcı fəaliyyətə həvəsləndirilməsi, onların istedad və bacarıqlarının hərtərəfli inkişaf etdirilməsi üçün əlverişli imkanlar yaradıldığını qeyd etmişdir. Bildirmişdir ki, Azərbaycan iqtisadiyyatının inkişafında əhəmiyyətli rolu olan ARDNŞ-də müasir biliklərə və vərdişlərə yiyələnmiş gənc kadrların hazırlanmasına ciddi önəm verilir. Gələcəkdə təlim mərkəzlərində keçirilən kurslar müasir 3D formatında proqramlaşdırılmış simulyatorlar vasitəsilə tədris olunacaqdır.
Səmimi qəbul üçün təşəkkür edən Dan Lejerskan mərkəzi qərargahı ABŞ-da yerləşən “EON Reality” şirkətinin dünyanın bir sıra aparıcı ölkələrinin enerjiyönümlü təşkilatları ilə əməkdaşlıq etdiyini bildirmişdir. Qeyd olunmuşdur ki, şirkət virtual tədrisin 3D formatında təşkili, həmçinin tələbələrin sertifikatlaşdırılması və müasir simulyatorlarda 3D formatının tətbiqini həyata keçirir.
TTSİ-nin rəisi F. Süleymanov “EON Reality” şirkəti ilə tərəfdaşlığın əhəmiyyətini vurğulamışdır.
Sonra ARDNŞ və “EON Reality” şirkətinin nümayəndələrinin iştirakı ilə yeni qurulacaq simulyasiya otaqları ilə bağlı təqdimat keçirilmişdir.
Bölmənin digər xəbərləri
