ARİEL KOHEN: AZƏRBAYCANDA MÜSBƏT DİNAMİKANI GÖRMƏKDƏN ÇOX MƏMNUNAM
Qonaqların Azərbaycanda baş verənlərə öz baxışları var.
Ariel Kohen İrandan Baltik dənizinədək Cənub-Şimal oxunun və Mərkəzi Asiyadan Qara dənizədək Şərq-Qərb oxunun kəsişməsində yerləşən Azərbaycana ABŞ-ın marağını ölkəmizin nadir coğrafi-siyasi vəziyyəti ilə izah edir. Ona görə də regionun bütün ölkələri və böyük dövlətlər burada baş verən hadisələrə böyük maraq göstərirlər. İkinci səbəb Corc Buş hökumətinin demokratikləşdirmədə israrlı olmasıdır. Görünür, siyasət və bəlağət Azərbaycanda yüksək səviyyəli nəticələr verir. Ölkədə ilk dəfə bütün tələblərə cavab verən əsil şəffaf seçkilər keçirilmişdir. Üçüncü səbəb isə, əlbəttə, Azərbaycan neftidir. Birləşmiş Ştatların Bakı-Tbilisi-Ceyhan neft kəmərinin işə salınmasında və Qazaxıstan neftinin də bu kəmərlə nəql olunmasında marağı vardır. Ümumiyyətlə, Yaxın Şərq, Venesuela, Nigeriya problemlər burulğanında çırpındığı bir vaxtda neftin alternativ mənbəyi olmalıdır. Yəni, bu, siyasi cəhətdən sabit olmayan digər neft regionları üçün alternativ neft hövzəsidir.
Azərbaycana bu qədər maraq həm də onunla izah olunur ki, bir çox analitiklərin fikrincə, burada asayişin pozulması halları baş verə bilər və bu ölkə ədalətli seçkilər keçirə bilməz. Bütün günü seçki məntəqələrində olmuş Kohen demişdir: “Bu, belə deyildir. Rusiyada və Şərqi Avropa ölkələrində izlədiyim seçkilərlə müqayisədə buradakı seçkilər çox dəqiq, intizamlı, müxtəlif partiyalardan müşahidəçilərin, xarici müşahidəçilərin iştirakı, ciddi exit-poll sistemi üzrə sorğunun aparılması, demək olar, asayiş pozulmadan keçdi. Orada da, burada da asayişin pozulması halları qeydə alınmışdı, lakin belə hallar Floridadan tutmuş Misirədək hər yerdə, istənilən seçkilərdə baş verir. Azərbaycanda seçkilər zamanı qeydə alınmış pozuntular barədə seçki komissiyalarına məlumat verilmişdir və bu faktlar araşdırılacaqdır”.
Mixail Qusman da onun fikirləri ilə razıdır. O demişdir: “Postsovet məkanında baş verən hadisələr müxtəlif cür inkişaf edir. “Narıncı inqilab” Azərbaycanda baş verə bilməzdi. Burada inqilablar etməyə qadir qüvvələr yoxdur. İstənilən müxalifətə, o cümlədən Azərbaycan müxalifətinə olan hörmətimə baxmayaraq, deməliyəm ki, bugünkü Azərbaycan müxalifəti inqilab etməyə qadir deyildir, çünki cəmiyyətdə onu qidalandıran mühit yoxdur”.
A.Kohen demişdir ki, Azərbaycanda müsbət dinamikanı görməkdən çox məmnundur. Bu, ona dəlalət edir ki, bütövlükdə cəmiyyət və siyasi sinif yaşa dolur, kamilləşir. Seçkilərin təşkilati sistemi yaxşı işləyir və ən başlıcası, sovet modelinə ehtiyac olmadığını dəfələrlə bildirən və müvafiq fərmanlar imzalayan Prezident İlham Əliyevin liderliyi var. Azərbaycan hamı tərəfindən qəbul edilmiş çoxpartiyalılıq əsasında Avropa modelinə doğru gedir.
Seçkilərdə adların müxtəlifliyi diqqəti cəlb edir - burada həm hökumət qüvvələri, həm müxalifət nümayəndələri, həm də müstəqil namizədlər var. Belə seçkilərin nəticəsi olan yeni parlament Azərbaycanda parlamentarizmin inkişaf etdirilməsində mühüm vasitəyə çevriləcəkdir. Çünki deputat mandatı uğrunda ədalətli və şəffaf mübarizə şəraitində parlamentə gələn adamlar vəzifələrini məsuliyyətlə yerinə yetirəcəklər.
Bölmənin digər xəbərləri
