Bakı, 29 avqust, AZƏRTAC

“Qarabağ”ın fiziki cəhətdən rəqibdən zəif olduğunu demək düzgün yanaşma deyil”.

Bu sözləri AZƏRTAC-a açıqlamasında veteran futbolçu Arif Əsədov “Qarabağ”ın UEFA Çempionlar Liqasının pley-off mərhələsində Bakıda Xorvatiyanın “Dinamo” klubuna 0:2 hesabı ilə məğlub olduğu cavab oyunu barədə danışarkən deyib.

54 yaşlı mütəxəssis bildirib ki, Ağdam təmsilçisinin mərhələni adlamasına bəxt amili mane olub: “Rəqibin avrokubok təcrübəsinin “Qarabağ”dan qat-qat çox olduğu əvvəldən hamıya məlum idi. Həm evdəki, həm də səfərdəki matçda çoxlu qol epizodları yaratdıq. Sadəcə, futbolçularımız əllərinə düşən imkanlardan yararlana bilmədilər. Düşünürəm ki, şans bizim tərəfimizdə olmadı. Real qol epizodlarından istifadə edə bilməyəndə komanda daxilində istər-istəməz inamsızlıq yaranır. “Dinamo” olduqca səliqəli oyun nümayiş etdirdi. Müdafiədə yaxşı oynayır, sürətlə əks-hücuma keçirdilər. Buna görə də “Qarabağ”ın qarşısını almağı bacarırdılar. Bu klubun heyətində qiymət baxımından üstün oyunçular çıxış edir. Onların ustalıq səviyyəsi meydanda görünürdü. Buna baxmayaraq, ağdamlılar qarşılaşmanın son dəqiqələrinə kimi xorvatiyalılara təzyiq göstərdilər. Təəssüf ki, bəxt amili özünü büruzə verirdi”.

A.Əsədov Ağdam təmsilçisinin dünənki məğlubiyyətdən sonra bütün fikrini Avropa Liqasına yönəltməli olduğunu vurğulayıb: “Bu turnirdə artıq kifayət qədər təcrübəmiz var. İldən-ilə daha da yaxşı nəticələr əldə etmək, irəliyə getmək olar. Ötən mövsüm 1/4 finala kimi addımladıq. Püşkatmanın nəticəsindən də çox şey asılıdır. Ümid edək ki, qrupdakı rəqiblər “Qarabağ” üçün çətin olmasın. Digər Avropa klubları ilə müqayisə etsək, “Qarabağ”ın orta səviyyəli kollektiv olduğunu deyə bilərik. İnanaq ki, Qurban Qurbanovun yetirmələri təcrübələrini artıraraq, ötənilki nəticəni daha da yaxşılaşdıracaqlar”.

Qeyd edək ki, pley-offda Xorvatiyanın “Dinamo” (Zaqreb) klubuna hər iki matçda (0:3, 0:2) uduzan “Qarabağ” mübarizəni Avropa Liqasının əsas mərhələsində davam etdirəcək.