Аslana Əliyeva: Rəqs sənəti Azərbaycan ilə Özbəkistan arasında mədəni əlaqələri möhkəmləndirir
Bakı, 28 avqust, AZƏRTAC
Azərbaycan ilə Özbəkistan arasında dostluq münasibətləri həmişə özünəməxsus xarakter daşıyıb. Ölkələrimizi yalnız ümumi tarix və qarşılıqlı hörmət deyil, həm də yaxın mənəvi və insani dəyərlər bağlayır. Mədəniyyət bu əlaqəni tərcüməyə ehtiyac olmadan hiss etməyə imkan verən universal dildir.
Bu sözləri Özbəkistan Dövlət Xoreoqrafiya Akademiyasının məzunu, xoreoqraf-baletmeyster Aslana Əliyeva AZƏRTAC-ın müxbirinə şərhində deyib.
Həmsöhbətimizin sözlərinə görə, xoreoqraf kimi o, iki xalqın mənəvi yaxınlığını xüsusilə də rəqs sənəti vasitəsilə daha aydın hiss edir. “Azərbaycan və Özbəkistan mədəniyyətləri eyni səhnədə görüşəndə xalqlarımız arasında nə qədər çox oxşarlıq olduğunu və eyni zamanda, onların hər birinin nə qədər özünəməxsus olduğunu anlayırsan. Düşünürəm ki, iki ölkə arasında imzalanmış “Əbədi dostluq haqqında Müqavilə” mədəni mübadilənin genişləndirilməsi, birgə layihələrin həyata keçirilməsi, festivalların və yaradıcılıq görüşlərinin keçirilməsi, həmçinin incəsənətin, təhsilin və gənclərlə bağlı təşəbbüslərin inkişafı üçün yeni imkanlar açacaq. Xalqlarımızın bir-biri haqqında yalnız məlumatlı olması deyil, həm də canlı ünsiyyət və mədəniyyət sayəsində daha da yaxınlaşmaqda davam etməsi çox vacib məsələdir”, - deyə xoreoqraf-baletmeyster qeyd edib.
Özbəkistanın həyatındakı rolundan danışan Aslana Əliyeva bu ölkədə təhsil almasının onun peşəkarlığına və yaradıcılıq yoluna böyük təsir göstərdiyini vurğulayıb. “Məhz burada təhsil almaq mənim üçün böyük imkan oldu, belə ki, yalnız rəqs sənətini nəzəri cəhətdən öyrənmək deyil, həm də özbək xoreoqrafiyasının mədəniyyəti, ənənələri və xüsusiyyətləri ilə yaxından tanış olmaq imkanı qazandım. Milli rəqs sənətinin korifeylərindən özbək rəqslərini öyrənmək mənim üçün xüsusilə dəyərlidir. Mən bunu yalnız peşəkar təcrübəmin ən mühüm hissəsi kimi deyil, həm də böyük şərəf kimi qəbul edirəm. Özbək rəqs sənətini onun görkəmli ustadlarından birbaşa və bu qədər dərindən öyrənmək imkanı qazanan ilk azərbaycanlı rəqqasə olduğumu anlamaq mənə xoşdur”, - deyə o əlavə edib.
Aslana Əliyevanın sözlərinə görə, Özbəkistanda olarkən o, yalnız tələbə olmağa deyil, həm də iki ölkə arasında bir növ mədəni körpü olmağa çalışır. “Mən Özbəkistandakı Azərbaycan səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzində xoreoqraf-baletmeyster kimi çalışıram, eyni zamanda, “Qarabağ Zəfəri” Azərbaycan rəqs ansamblının rəhbəriyəm. Fəaliyyətim vasitəsilə Özbəkistan sakinlərinin Azərbaycan rəqsləri, onların tarixi, xarakteri və gözəlliyi ilə daha yaxından tanış olmalarına kömək etməyə çalışıram. Bu ölkədə təhsil aldığım və işlədiyim müddətdə Özbəkistan Dövlət Xoreoqrafiya Akademiyasında və “Bahor” Dövlət Rəqs Ansamblında Azərbaycan rəqsi üzrə ustad dərsləri də keçirmişəm. Bu, mənim üçün xüsusilə vacibdir, çünki bu yolla həqiqi mədəni mübadilə baş verir. Belə ki, mən özbək mədəniyyətinin nümayəndələrindən öyrənir, eyni zamanda, Azərbaycan mədəniyyətini özbək rəqqasları ilə bölüşürəm”, - deyə həmsöhbətimiz vurğulayıb.
Azərbaycan və Özbəkistan arasında tələbə mübadilələrinin əhəmiyyətinə toxunan xoreoqraf qeyd edib ki, belə proqramlar gənc mütəxəssislər üçün böyük imkanlar yaradır. Onun sözlərinə görə, başqa ölkənin mədəniyyətini həqiqi başa düşmək üçün onu yalnız kitablardan öyrənmək kifayət deyil, həmin xalqın arasında yaşamaq, ustadlardan öyrənmək və mədəni mühitin bir hissəsinə çevrilmək lazımdır.
“2024-cü ildə akademik mobillik proqramı çərçivəsində Özbəkistan Dövlət Xoreoqrafiya Akademiyasına göndərildim. Bu, mənim üçün həqiqətən əhəmiyyətli hadisə oldu, çünki Özbəkistanın rəqs sənətini öyrənmək və eyni zamanda, Azərbaycan mədəniyyətini Özbəkistanda təmsil və təbliğ etmək üçün bir il müddətinə göndərilən ilk tələbə idim. Bu gün özümün də Özbəkistanın rəqs sənətini Azərbaycanda təmsil edən şəxslərdən biri olmağım xüsusi xoş təsir bağışlayır. Azərbaycan rəqsindən sonra özbək rəqsi mənim üçün həqiqətən doğma oldu. İndi bu mədəni mübadiləni əks istiqamətdə davam etdirməyə - Azərbaycan tamaşaçılarını özbək rəqsləri ilə tanış etməyə, öz biliklərimi bölüşməyə və bu sənət haqqında danışmağa çalışıram”, - deyə A.Əliyeva vurğulayıb.
O, həmçinin əlavə edib ki, xaricdə təhsil almaq peşəkar təcrübə qazanmaq, həmfikir şəxslər tapmaq, möhkəm əlaqələr qurmaq və ən əsası, iki dövlət arasında əsl mədəni körpüyə çevrilmək imkanı yaradır: “Belə proqramlar sayəsində gənc mütəxəssislər yalnız yeni biliklər əldə etmir, həm də Azərbaycan ilə Özbəkistanın daha da yaxınlaşmasına özləri töhfə verirlər”.
Müxbir – Günel Əliyeva
Bölmənin digər xəbərləri
