SİYASƏT
Astanadakı həftəsonu Azərbaycan məktəbində ana dilimiz və tariximiz tədris olunur
![Astanadakı həftəsonu Azərbaycan məktəbində ana dilimiz və tariximiz tədris olunur](/files/2022/3/1200x630/16666080943499138214_1200x630.jpg)
Bakı, 24 oktyabr, AZƏRTAC
Qazaxıstanın paytaxtı Astanada fəaliyyət göstərən “Xəzər” Azərbaycan Etnomədəni Birliyinin nəzdindəki həftəsonu Azərbaycan məktəbində yeni tədris ili başlayıb.
Diasporla İş üzrə Dövlət Komitəsindən AZƏRTAC-a bildirilib ki, burada şagirdlərə Azərbaycan dili və Azərbaycan tarixi fənləri tədris edilir. Xalqımızın qədim və müasir tarixinin, xüsusilə də Zəfər salnaməsinin öyrənilməsinə xüsusi diqqət yetirilir.
Dərslərdən sonra soydaşlarımızın övladlarının maraq dairəsini əhatə edən müxtəlif əyləncələr də təşkil edilir.
Qeyd edək ki, “Xəzər” Azərbaycan Etnomədəni Birliyi 2000-ci ildən Qazaxıstanda yaşayan azərbaycanlıların birləşdirilməsi, Azərbaycanın etnik-mədəni dəyərlərinin qorunub saxlanmasının təmin edilməsi və təbliği istiqamətində fəal iş aparır, soydaşlarımızın öz tarixi vətənləri ilə əlaqələrini inkişaf etdirir. Yarandığı vaxtdan etibarən birlik tərəfindən Qazaxıstanda yaşayan sosial müdafiəsiz azərbaycanlılara dəstək istiqamətində önəmli işlər görülüb. Ötən dövr ərzində burada gənc nəslin Azərbaycan xalqının adət-ənənələrinə hörmət ruhunda yetişdirilməsi məqsədi daşıyan milli incəsənət festivalları, sərgilər, ənənəvi Azərbaycan bayramları, aksiyalar, konfranslar keçirilib.