QAN YADDAŞI
ASTARADA 20 YANVAR FACİƏSİNİN İYİRMİNCİ İLDÖNÜMÜ İLƏ BAĞLI TƏDBİRLƏR KEÇİRİLİR
Astara, 13 yanvar (AZƏRTAC). 20 Yanvar faciəsinin iyirminci ildönümü ilə əlaqədar Astara rayonunda silsilə tədbirlərin reallaşdırılmasına başlanılmışdır.
Astara Rayon İcra Hakimiyyəti tərəfindən hazırlanmış tədbirlər planına uyğun olaraq, təhsil və mədəni-maarif müəssisələrində qanlı faciə ilə bağlı konfranslar, ədəbi-bədii gecələr, şeir və rəsm müsabiqələri, idman yarışları keçirilir, qırğının dəhşətlərini əks etdirən sərgilər təşkil olunur. “Astara” qəzetində 20 Yanvar faciəsi ilə bağlı müxtəlif yazılar və fotoşəkillər dərc edilir.
Ümumxalq hüzn gününədək şəhər, qəsəbə, kəndlərdə Azərbaycanın müstəqilliyi və ərazi bütövlüyü uğrunda şəhid olanların şərəfinə ucaldılmış abidələrin təmir edilməsi, rayonun bütün məsçidlərində dini mərasimlərin keçirilməsi nəzərdə tutulur.
Yanvarın 19-da Astara Pedaqoji Texnikumunda və rayonun bütün ümumtəhsil məktəblərində 20 Yanvar faciəsinə həsr olunmuş xüsusi dərslər keçiriləcəkdir.
Yanvarın 20-də ümumxalq hüzn günü ilə əlaqədar rayonun ərazisində dövlət bayraqları endiriləcək, Şəhidlər xiyabanında mərasim keçiriləcək, saat 12.00-da bütün yaşayış məntəqələrində şəhidlərin xatirəsi bir dəqiqəlik sükutla yad ediləcək, avtomobillərdən səs siqnalları veriləcəkdir.