ASTARADA İRAN VƏ AZƏRBAYCANIN SƏHİYYƏ İŞÇİLƏRİNDƏN İBARƏT NÜMAYƏNDƏ HEYƏTLƏRİNİN GÖRÜŞÜ OLMUŞDUR
Tədbir iştirakçıları Azərbaycanın müstəqilliyi və ərazi bütövlüyü uğrunda həlak olan oğullarımızın xatirəsinə Astara şəhərində ucaldılmış abidə kompleksinin önünə gül-çiçək dəstələri düzmüş, şəhidlərin xatirəsini ehtiramla yad etmişlər.
Toplantıda ümummilli liderimiz Heydər Əliyevin xatirəsi bir dəqiqəlik sükutla anılmışdır.
Görüşdə İran İslam Respublikasının Səhiyyə, Müalicə və Tibbi Təhsil Nazirliyi və Azərbaycan Respublikasının Səhiyyə Nazirliyi arasında imzalanmış Memoranduma uyğun olaraq ikitərəfli əməkdaşlıq, sərhədyanı rayonlarda əhaliyə göstərilən səhiyyə xidmətinin yaxşılaşdırılması, təcrübə mübadiləsi məsələləri, yoluxucu və digər xəstəliklərlə mübarizə ilə əlaqədar hazırlanmış ikitərəfli müqavilənin müddəaları ətraflı müzakirə edilmişdir.
Nümayəndə heyətləri Astara görüşündə Azərbaycan və İran arasında sərhədyanı ərazilərdə səhiyyənin inkişafı ilə bağlı ikitərəfli müqavilənin 2006-cı ilin əvvəllərində İran İslam Respublikasının Culfa şəhərində imzalanmasını qərara almışlar.
Görüş başa çatdıqdan sonra tədbir iştirakçıları Astara rayonunun səhiyyə müəssisələrində əhaliyə göstərilən tibbi xidmətin vəziyyəti ilə tanış olmuşlar.
Bölmənin digər xəbərləri
